काठमाडौं (हाम्रो खेलकुद) – नेपाली महिला राष्ट्रिय फुटबल टोलीले छैटौं साफ च्याम्पियनसिप २०२२ अन्तर्गत समूह बी को अन्तिम खेलमा आज श्रीलंकाको सामना गर्दैछ । खेल साँझ ५:३० बजे दशरथ रंगशालामा सुरु हुनेछ ।

नेपालले समूहको पहिलो खेलमा भुटानलाई ४-० ले हराउँदै सुखद सुरुवात गरेको थियो । भुटानले त्यसपछि दोस्रो खेलमा श्रीलंकालाई ५-० ले पराजित गर्दै सेमिफाइनलमा स्थान पक्का गरिसकेको छ । आजको खेलमा जित वा बराबरीले नेपाल सेमिफाइनलमा प्रवेश गर्नेछ । २ गोल अन्तरको हारले पनि नेपालले सेमिफाइनलमा स्थान बनाउनेछ ।

पहिलो खेलमा प्रशिक्षक कुमार थापाले मिडफिल्डर दीपा शाही र फरवार्ड अमिषा कार्कीलाई सुरुवाती रोजाइबाट नै डेब्यु दिएका थिए । मिडफिल्डमा दीपाले उत्कृष्ट प्रदर्शन गर्दा अमिशाले भने खास प्रभाव जमाउन सकिनन् । पहिलो हाफमा परिवर्तन भएकी अमिशा आज बेन्चमा रहने सम्भावना छ । भुटानविरुद्ध दोस्रो हाफमा उनको स्थानमा आएकी रेखा पौडेलले प्रभाव जमाएकी थिइन् । आज उनले सुरुवात गर्ने सम्भावना छ ।

प्रशिक्षक थापाले भुटानविरुद्ध दोस्रो हाफमा गोलरक्षक अन्जना रानामगरलाई पनि अवसर दिएका थिए । अन्जनाले एक सुन्दर बचाउ पनि गरिन् । तर आज कप्तान एन्जिलाले नै सुरुवात गर्ने देखिन्छ । डिफेन्समा पनि हिरा भुजेल, पुनम जर्घा मगर, गीता राना र अमृता जैशी नै निरन्तर खेल्ने देखिन्छ । पछिल्लो खेलमा समिक्षा घिमिरेले दोस्रो हाफमा मैदान छिर्दै डेब्यु गरेकी थिइन् । तर डिफेन्समा प्रशिक्षक थापाले परिवर्तन नगर्न सक्छन् ।

मिडफिल्डमा मन्जली कुमारी योन्जन उपलब्ध नहुँदा फेरी एकपटक अनिता केसी नै सुरुवात गर्न सक्छिन् । अन्तिम समयमा ज्वरो आएपछि भुटानविरुद्ध टोलीमा परिवर्तन गर्नुपरेको थापाले बताएका थिए । आजको खेलमा पनि मन्जली उपस्थित हुने छैनन् । अनिता बस्नेतले पहिलो खेलमा प्लेयर अफ द म्याचको प्रदर्शन गरेकी थिइन् । उनीसँगै दीपा शाही, अनिता केसी र सरु लिम्बु मिडफिल्डमा हुनेछन् । सरु र दीपाको जोडी नै मिडफिल्डमा देखिने सम्भावना छ ।

आक्रमणमा सावित्रा भण्डारी र रेखाले खेल्न सक्छन् । सावित्रा पछिल्लो केही दिन ज्वरोका कारण विश्राममा भएपनि खेलका लागि उपलब्ध हुने सम्भावना छ । प्रशिक्षक थापाले जोखिम लिन नचाहे अमिशा कार्की र रश्मीकुमारी घिसिङ विकल्पका रुपमा रहेका छन् ।