एजेन्सी – जर्मन बुन्डेसलिगमा बायर्न म्युनिख बराबरीमा रोकिदा बोरुसिया डर्टमुन्डले हार बेहोरेको छ । बायर्न घरेलु मैदानमा भीएफबी स्टुटगार्टसँग २–२ गोलको बराबरीमा रोकिएको हो ।

एलिएन्ज एरिना म्युनिखमा शनिबार राति भएको खेलमा घरेलु टोली बायर्नले दुई पटक अग्रता लिएर पनि त्यसलाई जोगाउन नसक्दा बराबरीमा रोकिन बाध्य बनेको हो । घरेलु टोलीका म्याथिस टेल र जमल मुसिएलाले गोल गर्दा स्टुटगार्टका क्रिस फुरिच र सेरोउ गुइरासीले बराबरी गोल फर्काए ।

खेलको ३६औं मिनेटमा म्याथिस टेलको गोलबाट बायर्नले पहिलो हाफमा १–० को अग्रता लिएको थियो । उनले अलफन्सो डाभिसको पासमा गोल गर्न सफल भएका थिए । ५२औं मिनेटमा सेरोउ गुइरासीले गोल गरेपनि भिएआरबाट मान्यना नपाउँदा स्टुटगार्ट बराबरीबाट चुक्यो ।

तर, ५७औं मिनेटमा क्रिस फुरिचले कोन्सटानटिनोस माभ्रोपानोसको पासमा गोल गर्दै खेललाई १–१ गोलको बराबरीमा ल्याए । स्टुटगार्टको बराबरी तीन मिनेट पनि टिकेन । ६०औं मिनेटमा जमल मुसिएलाले गोल गर्दै बायर्नलाई २–१ को अग्रता दिलाए ।

जिततर्फ ढल्किएको बायर्न अन्तिम समयमा सम्हालिन नसक्दा पेनाल्टीमा गोल खाएपछि बराबरीमा रोकिन बाध्य बन्यो । इन्ज्युरी समयको थप गरिएको दोस्रो मिनेटमा सेरोउ गुइरासीले पेनाल्टीमा गोल गर्दै टोलीलाई हारबाट जोगाए ।

यो बराबरीसँगै बायर्न ६ खेलबाट १२ अंक जोडेर शीर्षस्थानमा यथावत रहेको छ । स्टुटगार्ट ५ अंक जोडेर १३औं स्थानमा रहेको छ ।

अर्काे खेलमा डर्टमुन्ड घरेलु टोली आरबी लाइप्जिगसँग ३–० ले पराजित भएको छ । लाइप्जिगको जितमा विली अर्वन, डोमिनिक जोबोस्लाई र एमाडोउ हैदराले गोल गरे ।

यस नजितासँगै डर्टमुन्ड १२ अंक जोडेर चौथो स्थानमा रहेको छ । लाइप्जिग ८ अंक जोडेर १०औं स्थानमा रहेको छ ।