काठमाडौं (हाम्रो खेलकुद) – छैटौं महिला साफ च्याम्पियनसिप २०२२ अन्तर्गत समूह ए को खेलमा भारतले लगातार दोस्रो जित दर्ता गर्दै सेमिफाइनलमा स्थान बनाएको छ । माल्दिभ्सलाई ९-० ले पराजित गर्दै समूहबाट भारतसँगै बंगलादेश पनि अन्तिम चारमा प्रवेश गरेको हो ।

भारतले दोस्रो हाफको अन्त्यतिर ४ मिनेटको अन्तरमा ४ गोल गर्दै फराकिलो जित दर्ता गरेको हो । भारतको जितमा अन्जु तामाङ एक्लैले ४ गोल गरिन् । दाङमेइ ग्रेसले २ तथा सौम्य गुगुलोथ, एमके कश्मिना र प्रियंका देवीले १-१ गोल गरे ।

समूह ए मा भारत र बंगलादेश समान २-२ जितका साथ सेमिफाइनलमा प्रवेश गरेका हुन् । भारतले पहिलो खेलमा पाकिस्तानलाई ३-० ले पराजित गरेको थियो । यता बंगलादेशले पहिलो खेलमा माल्दिभ्सलाई ३-० तथा शनिबार भएको खेलमा पाकिस्तानलाई ६-० ले पराजित गरेको थियो । माल्दिभ्स र पाकिस्तान भने समूह चरणबाट बाहिरिएका छन् ।

दशरथ रंगशालामा भएको खेलको छैटौं मिनेटमा नै भारतले अग्रता लिने अवसर पाएको थियो । गोलरक्षक तथा माल्दिभ्सकी कप्तान अमिनाथ लिजाले क्रस छुटाएपछि भारतकी प्रियंका देवी नाओरमको प्रहारलाई शहफा सिउथले गोललाइनबाट क्लियर गरिन् ।

दशौं मिनेटमा दाङमेइ ग्रेसले वन भर्सेस वनमा गरेको प्रहार लिजाले बचाइन् । १३ औं मिनेटमा पेनाल्टी क्षेत्र भित्र डिफेन्डर बिट गरेपछि अन्जुले गरेको अन्तिम प्रहारले पोस्टको दिशा लिन सकेन ।

२४ औं मिनेटमा भारतले अन्जुको गोलमा अग्रता लियो । कप्तान आशालता देवीसँग छोटो कर्नर लिएकी अन्जुले फिर्ता आएको पासमा लामो प्रहार गरेकी थिइन् । उनले बायाँ विंगबाट गरेको प्रहार गोलरक्षकको हातमा लाग्दै गोल भएको हो ।

खेलको ४२ औं मिनेटमा भारतले अग्रता दोब्बर पार्यो । छोटो कर्नरमा कप्तान आशालताले दिएको लामो पास क्लियर हुन नसक्दा प्रियांकाले पेनाल्टी क्षेत्र भित्रबाट गरेको प्रहार गोल भएको थियो ।

पहिलो हाफको इन्ज्युरी समयमा अन्जुले भारतलाई ३-० ले अघि बढाइन् । रतनबाला देवी नोङमाइथेमले पेनाल्टी क्षेत्र बाहिरबाट गरेको प्रहार पोस्टमा लागेर गोलरक्षकलाई लाग्दै झरेपछि खाली पोस्टमा अन्जुले गोल गरेकी थिइन् ।

दोस्रो हाफको ५३ औं मिनेटमा ग्रेसले भारतलाई ४-० ले अघि बढाइन् । कप्तान आशालताले मैदानको मध्यभागबाट खेलाएको लामो पासलाई ग्रेसले नियन्त्रणमा लिइन् । त्यसपछि डिफेन्सलाई चलाखीपूर्ण बिट गर्दै उनले गोल गरिन् ।

त्यसको तीन मिनेटपछि नै भारतले अर्को गोल थप्यो । मध्यान्तरपछि मैदान छिरेकी सौम्याले कप्तान आशालताको छोटो कर्नरमा आएको क्रसलाई हेडरमार्फत गोल गरेकी थिइन् । ८० औं मिनेटमा सौम्याको प्रहार क्रसबारमा लगेर फर्कंदा भारतले अग्रता बढाउन सकेन ।

खेलको ८४ औं मिनेटमा एमके कश्मिनाले भारतको लागि गोल गरिन् । उनले गोलरक्षक पोजिसनमा नरहेको अवस्थामा झन्डै २५ यार्ड टाढाबाट गरेको प्रहार गोल भएको थियो । कप्तान लिजाले बल बचाउने प्रयास गरेपनि उनलाई लाग्दै बल पोस्टभित्र छिरेको थियो ।

८५ औं मिनेटमा अन्जुले कमजोर डिफेन्सको फाइदा उठाउँदै ७-० ले अघि बढाइन् । लगत्तै ग्रेसले लामो दुरीबाट गरेको प्रहार गोलरक्षक लिजाले राम्रोसँग समाउन नसक्दा उनको हातबाट पोस्टभित्र खसेको थियो । ८८ औं मिनेटमा अन्जुले व्यक्तिगत चौथो गोल थपिन् । रन्जना चानुको क्रसलाई उनले गोलमा परिणत गरेकी थिइन् ।