काठमाडौं (हाम्रो खेलकुद) – कप्तान सविना खातुनको ह्याट्रिकमा बंगलादेशले छैटौं महिला साफ च्याम्पियनसिप २०२२ अन्तर्गत समूह ए को दोस्रो खेलमा पाकिस्तानलाई पराजित गरेको छ ।

लगातार दोस्रो जित दर्ता गर्ने क्रममा बंगलादेशले ६-० को जित हासिल गरेको हो । पहिलो हाफदेखि नै आक्रामक फुटबल खेलेको बंगलादेशले पाकिस्तानलाई खेल अवधिभर दबाबमा राखेको थियो । काउन्टर अट्याकमा केही आक्रमण मुभ सिर्जना गर्नुबाहेक पाकिस्तान अधिकांश समय डिफेन्समा व्यस्त रहयो ।

खेलको तेस्रो मिनेटमा नै बंगलादेशले मोनिका चक्माको गोलमा अग्रता लियो । कप्तान सविना खातुनले दायाँ विंगबाट दिएको क्रस डिफेन्सले क्लियर गरेपनि पेनाल्टी क्षेत्र बाहिर रहेकी मोनिकाले सुन्दर गोल गरिन् । अनमार्क रहेकी मोनिकाले बललाई नियन्त्रणमा लिँदै दोस्रो बारको बटम कर्नरमा सुन्दर प्लेसमेन्ट गरिन् ।

त्यसअघि पहिलो मिनेटमा नै पाकिस्तानले सुवर्ण अवसर प्राप्त गरेको थियो । एकल प्रयासमा जुल्फिया नाजिरले मिडफिल्डबाट बल अघि बढाउँदै वन भर्सेस वनको स्थितिमा प्रहार गरेपनि गोलरक्षक रुपना चक्माले बचाउ गरिन् । १२ औं मिनेटमा कप्तान सविनाले अग्रता दोब्बर पार्ने अवसर खेर फालिन् । सिरात जहान सोप्नाको पास लिँदा ६ यार्ड बक्सअघि अनमार्क रहेकी उनको प्रहार पोस्टभन्दा माथि गएको थियो ।

२८ औं मिनेटमा सोप्नाले बंगलादेशको अग्रता दोब्बर पारिन् । काउन्टर अट्याकमा उत्कृष्ट टिम मुभलाई सोप्नाले सुन्र फिनिसका साथ अन्त्य गरिन् । कप्तान सविनाको अन्तिम पासलाई उनले नियन्त्रणमा लिँदै गोलरक्षक सायदा महापारालाई कुनै मौका दिइनन् ।

३१ औं मिनेटमा सविनाले बंगलादेशलाई ३-० ले अघि बढाइन् । मारियासँग वन टु पास खेल्ने क्रममा अन्तिम पासलाई पाकिस्तानी डिफेन्सले क्लियर गर्न नसक्दा सविनाले पेनाल्टी क्षेत्रभित्र खुला बललाई पोस्टको दिशा दिइन् । ३५ औं मिनेटमा सविनाले व्यक्तिगत दोस्रो गोल गरिन् । सन्जिदा अख्तरको कटब्याकमा गोलरक्षक बिट भएपछि सविनाले ६ यार्ड बक्स भित्रबाट डिफेन्सको चुनौती पन्छाउँदै गोल गरिन् ।

३८ औं मिनेटमा पाकिस्तानकी गोलरक्षक महापाराले सुन्दर बचाउ गर्दो गोल अन्तर बढाउन दिइनन् । पहिलो हाफको इन्ज्युरी समयमा जुल्फिया नाजिरले पाकिस्तानका लागि अग्रता घटाउने अवसर पाएपनि सदुपयोग गर्न सकिनन् । काउन्टरमा अघि बढेकी जुल्फियाको प्रयासलाई बंगलादेशकी गोलरक्षक रुपना चक्मा र अखि खातुनले विफल पारेका थिए ।

दोस्रो हाफको ५८ औं मिनेटमा सविनाले ह्याट्रिक पूरा गरिन् । मारिया मान्दाले दायाँ विंगबाट दिएको क्रसलाई सविनाले उत्कृष्ट हेडरमार्फत गोल पूरा गरिन् । उनले प्रतियोगिताको पहिलो ह्याट्रिक समेत प्रहार गरेकी हुन् ।

६७ औं मिनेटमा सुहा हिरानीले पेनाल्टी क्षेत्र बाहिरबाट गरेको प्रहारलाई गोलरक्षक चक्माले सहजै बचाइन् । ७६ औं मिनेटमा बंगलादेशका लागि ऋतु पूर्णा चक्माले सुन्दर गोल गरिन् । उनले झन्डै २५ यार्ड टाढाबाट गरेको प्रहार गोलरक्षक महापाराले बचाउन सकिनन् ।

आज हुने समूह ए को दोस्रो खेलमा भारत र माल्दिभ्स खेल्नेछन् । खेल साँझ ५:३० बजे सुरु हुनेछ । समूह ए मा बंगलादेश २ खेलमा ६ अंकसहित शीर्ष स्थानमा छ । भारतको ३ अंक छ भने माल्दिभ्स र पाकिस्तान अंकविहिन छ । आजको खेलमा भारतले जित हासिल गरे बंगलादेश र भारत सेमिफाइनलमा प्रवेश गर्नेछन् ।