काठमाडौं (हाम्रो खेलकुद)– भुटानले महिला साफ च्याम्पियनसिपको समूह चरणमा शुक्रबार श्रीलंकाविरुद्ध खेलमा अग्रतालाई दोब्बर बनाएको छ । दशरथ रंगशालामा जारी खेलेको दोस्रो हाफ सुरु भएको पाँचौं मिनेटमै भुटानले अर्को गोल थपेपछि भुटान २–० ले अघि लागेको छ ।

दोस्रो गोल ५० औं मिनेटमा डेखी लाजोमले गरेकी थिइन् । पेनाल्टी बक्स भित्र घले वाङ्मोको पासमा डेखीले गोल गरेकी हुन् ।
त्यसअघि नामङ्याल डेमाको सानदार गोलमा भुटानले अग्रता लिएको थियो । ४२ औं मिनेटमा पेनाल्टी बक्सको केहि बाहिर पाएको अवसरमा नामङ्यालले पहिलो बारमा गोल गरेका थिइन् ।

भुटानका लागि आजको खेल महत्वपूर्ण रहेको छ । आजको खेल गुमाएको खण्डमा भने भुटान च्याम्पियनसिपबाट बाहिरिने छ । समूह बीको पहिलो खेलमा नेपालले भुटानलाई ४–० ले हराएको थियो । श्रीलंकाले भने अर्को खेल भदौ २७ गते नेपालसँग खेल्ने छ ।

भुटानले साफ च्याम्पियनसिपमा अहिले सम्म जित निकाल्न सकेको छैन । सन् २०१० मा श्रीलंकाविरुद्धकै खेलमा भुटानले १–१ को बराबरी खेलेको थियो । भुटानको साफ च्याम्पियनसिपमा अहिले सम्मको त्यो नै सफल नतिजा हो ।

समूह एमा साविक विजेता समेत रहेको भारतले र बंगलादेशले विजयी सुरुवात गरेका छन् । भारतले पाकिस्तानलाई र बंगलादेशले माल्दिभ्सलाई समान ३–० ले हराएको थियो । भारत च्याम्पियनसिपको सबै ५ संस्करणको विजेता हो । नेपालले भने ४ पटक फाइनल खेलेको छ । एक पटक बंगलादेश फाइनल पुगेको थियो ।