काठमाडौं (हाम्रो खेलकुद)– अखिल नेपाल फुटबल संघ (एन्फा) ले सहिद स्मारक ए डिभिजन लिग सकिएको ६ महिना भन्दा पनि लामो समयपछि विजेतासहित शीर्ष ३ टोलीको पुरस्कार रकम प्रदान गरेको छ ।

‘बी’ डिभिजनको पनि विजेतासहित शीर्ष ३ टोलीले पुरस्कार रकम प्राप्त गरेका छन् । त्यस्तै ए र बीका उत्कृष्ट खेलाडी, उत्कृष्ट गोलकिपर र उदियमान खेलाडीले पनि पुरस्कार उपलब्ध गराइएको एन्फाले जनाएको छ ।

फागुनमा सम्पन्न ए डिजिभन लिगको विजेता मछिन्द्र क्लबले ७५ लाख, दोस्रो भएको त्रिभुवन आर्मी फुटबल क्लबले ५० लाख, एनआरटीलाई २५ लाख प्राप्त गरेको छ । फेयर प्ले भए वापत सातदोबाटोले २ लाख रुपैयाँ पाएको छ ।

ए डिभिजन लिगका उत्कृष्ट खेलाडी मछिन्द्रका सुनिल बलले ३ लाख, उत्कृष्ट गोलकिपर सोही क्लबका विशाल श्रेष्ठले २ लाख र उदीयमान खेलाडी दिनेश हेन्जनले १ लाख ५० हजार रुपैयाँ प्राप्त गरेको बताइएको छ । त्यस्तै म्यान अफ दी म्याचको रकम भने एन्फाले सम्बन्धित क्लबलाई उपलब्ध गराएको छ ।

त्यस्तै चैतमा सम्पन्न बी डिभिजन लिगको विजेता चर्च ब्वाइज युनाइटेड फुटबल क्लबलाई १५ लाख, खुमलटार युवा क्लबले १० लाख र तेस्रो भएको टोली आरसिटीले ५ लाख रुपैयाँ रुपैयाँ भुक्तानी दिएको एन्फाले जनाएको छ । बीका उत्कृष्ट खेलाडी चर्च ब्वाइजका आशिष चौधरीले १ लाख, उत्कृष्ट गोलकिपर आरसिटीका सरोज तामाङ र सर्वाधिक गोलकर्ता चर्च ब्वाइजका आशिष चापागाईले समान ५० हजार रुपैयाँ प्राप्त गरेका छन् ।