पुरुष फुटबलको उद्घाटनमा पुलिस र पूर्वाञ्चल भिड्ने

-सातौं राष्ट्रिय खेलकुद

काठमाडौं (हाम्रो खेलकुद)– सातौं राष्ट्रिय खेलकुदअन्तर्गत पुरुष फुटबलको बिहीबार हुने उद्घाटन खेलमा नेपाल पुलिस र पूर्वाञ्चल भिड्ने भएका छन् । सुनसरीको धरानस्थित एन्फा टेक्निकल सेन्टरको मैदानमा हुने प्रतियोगितामा पाँच विकास क्षेत्र र तीन विभागीय गरी ८ टिमले लिग कम नकआउट आधारमा प्रतिस्पर्धा गर्ने राष्ट्रिय खेलकुद परिषद् (राखेप) ले जनाएको छ ।

पुलिस र पूर्वाञ्चलसहित समूह ‘क’ मा पश्चिमाञ्चल र मध्यमाञ्चल छन् । साविक विजेता सुदूरपश्चिमाञ्चलसहित एपीएफ, मध्यपश्चिमाञ्चल, र आर्मी छन् समूह ‘ख’ मा छन् । लिग कम नकआउट पछि समूह विजेता र उपविजेता सेमिफाइनलमा पुग्नेछन् । पहिलो दिन बिहीबार अर्को खेल पश्चिमाञ्चल र मध्यमाञ्चलबीच हुनेछ । फाइनल सातौं राष्ट्रिय खेलकुदको अन्तिम दिन पुस १५ गते हुनेछ ।
महिला फुटबल पुस २ गते बाटै सुरु भइसकेको छ भने पुरुष फुटबल सातौं राष्ट्रिय खेलकुद उद्घाटनको अघिल्लो दिन हुँदैछ । पुस ११ देखि भारतको सिलगुढीमा महिला साफ च्याम्पियनसिप सञ्चालन हुने भएकाले राष्ट्रिय खेलकुदको महिला फुटबल अगाडी नै सुरु गरिएको हो ।