काठमाडौं (हाम्रो खेलकुद) – फरवार्ड सावित्रा भण्डारी र मिडफिल्डर अनिता बस्नेतको २-२ गोलमा नेपालले छैटौं महिला साफ च्याम्पियनसिपमा भुटानलाई ४-० ले पराजित गर्दै सुखद सुरुवात गर्यो ।

खेलमा उत्कृष्ट प्रदर्शन गरेकी विंगर अनिता बस्नेत प्लेयर अफ द म्याच चुनिइन् । उनले ७३ औं र ८५ औं मिनेटमा गोल गरेकी थिइन् । उनको पहिलो गोल विशेष थियो । बायाँ विंगबाट तीन डिफेन्डरलाई बिट गर्दै पेनाल्टी क्षेत्रको बीच भागको बाहिरबाट उनले गरेको शक्तिशाली प्रहार सिधै गोल भएको थियो ।

खेलपछि पत्रकार सम्मेलनमा बोल्दै अनिताले आफ्नो प्रदर्शनबाट खुसी भएको बताइन् । ‘आजको प्रदर्शनबाट एकदम खुसी छु । सुरुवातमा वर्षाका कर्ण खेल्न कठिन भयो । बल ठम्याउन कठिन भएको थियो । तर दोस्रो हाफमा हामीले आफ्नो योजना अनुसार खेल्न सक्यौं । चाहेजस्तो प्रदर्शन भयो,’ उनले भनिन् ।

‘मैले आज गोल गर्छु नै सोचेको थिएँ । पहिलो हाफमा सोचेजस्तो खेल्न त सकिएन । तर दोस्रो हाफमा राम्रो भयो । गोल पनि निकै राम्रो थियो । मैले सोचेभन्दा राम्रो,’ अनिताले हाँस्दै भनिन् ।

पछिल्लो समय अनिताको प्रदर्शन राम्रो हुन सकेको थिएन । घरेलु फुटबलमा एपिएफबाट पनि सोचेजस्तो खेल्न नसकेकी उनले आफू पुरानो लयमा फर्कन प्रयासरत रहेको बताइन् । ‘म पछिल्लो समय लय बाहिर थिएँ । म आफैंलाई पनि सहज महसुस भएको थिएन । तर यसपटक आफूलाई सिद्ध पार्ने अवसर छ । पुरानो लयमा फर्कन सक्दो प्रयास गर्नेछु,’ उनले भनिन् ।

यो पनि :

‘पानी परेको कारण समयमा गोल निकाल्न सकेनौं’

सावित्रा र अनिता चम्कँदा नेपालको विजयी सुरुवात