काठमाडौं (हाम्रो खेलकुद) – साफ महिला च्याम्पियनसिपको छैटौं संस्करण मंगलबारदेखि दशरथ रंगशालामा सुरु हुँदैछ । प्रतियोगिताको उद्घाटन खेलमा नेपालले भुटानको सामना गर्दैछ ।

साफ च्याम्पियनसिपको इतिहासमा हालसम्म भुटानले नेपाललाई हराउन सकेको छैन । यसपटक उद्घाटन खेलमा भुटानले घरेलु टोली नेपालको सामना गर्दैछ । भुटानकी प्रशिक्षक क्युङ सुक होङले प्रतियोगिताका लागि राम्रो तयारी गरेर आएको बताइन् । टोलीकी कप्तान पेमा छोदेन छिरिङले घरेलु मैदानमा नेपालको सामना गर्न सहज नहुने बताइन् ।

प्रतियोगिताको पूर्व सन्ध्यामा आयोजित पत्रकार सम्मेलनमा उनले नेपाली समर्थकमाझ खेल्न मानसिक रुपमा पनि कठिन हुने अभिव्यक्ति दिइन् । ‘हाम्रो टोलीमा युवा खेलाडीको बाहुल्यता छ । नेपाल निकै बलियो टोली हो । घरेलु टोलीविरुद्ध खेल्न सहज हुने छैन,’ उनले भनिन्, ‘घरेलु समर्थकको अगाडि खेल्नु मानसिक रुपमा पनि सहज हुँदैन ।’

‘हामी लामो समय देशबाहिर गएर खेल्न पाएका छैनौं । त्यसैले नेपालमा चाडै आएर मैत्रीपूर्ण खेल पनि खेलेका छौं । यहाँको वातावरणसँग भिजेका छौं,’ उनले भनिन्, ‘घरेलु लिगको भरमा हामीले टोली निर्माण गरेका छौं । आशा छ राम्रो नतिजा आउनेछ ।’

श्रीलंकाका प्रशिक्षक चामिन्दा निल स्टेनवालले देशमा आर्थिक अवस्थाकाले तयारीमा प्रतिकूल असर परेको बताए । ‘हाम्रो देशको कमजोर आर्थिक अवस्थाले तयारीमा असर गर्यो । हामीले एक ठाउँमा रहेर प्रशिक्षण गर्न पनि निकै मिहिनेत गर्नुपर्यो । यातायात व्यवस्था मिलाउन नै कठिन पर्यो । यो सबले प्रशिक्षणमा असर गरेको छ,’ उनले भने ।

‘हामी अहिले सबै समस्या बिर्सेर प्रतियोगितामा खेल्न आएका छौं । हामीले ४ साता प्रशिक्षण गरेका छौं । सकेसम्म राम्रो नतिजा ल्याउने प्रयास हुनेछ,’ उनले थपे । श्रीलंकाकी कप्तान पुर्णिमाले साफ खेल्न नेपाल आउँदा खुसी लागेको र प्रतियोगितामा खेल्न उत्साहित रहेको बताइन् ।