काठमाडौं (हाम्रो खेलकुद)– गोलकिपर एन्जिला तुम्बापो सुब्बा महिला राष्ट्रिय टोलीको नयाँ कप्तान नियुक्त भएकी छन् । साफ च्याम्पिनसिप सुरु हुन एक दिन बाँकी रहँदा सोमबार मुख्य प्रशिक्षक कुमार थापाले एन्जिलालाई कप्तान र अर्की सिनियर खेलाडी अमृता जैसीलाई उपकप्तानको जिम्मेवारी दिएका हुन् ।

थापाले आफ्नो निर्णय अखिल नेपाल फुटबल संघ (एन्फा) लाई जानकारी दिइसकेका दिइसकेको बताइएको छ । उनले सिनियर खेलाडीलाई कप्तानको जिम्मेवारी दिने यसअघि नै प्रष्ट पारिसकेका थिए । साफ च्याम्पियनसिपको प्रशिक्षणका क्रममा नियमित कप्तान रेनुका नगरकोटे घाइते भएपछि उनी राष्ट्रिय टोलीबाट बाहिरिसँगै नयाँ कप्तान नियुक्त गर्नुपरेको हो ।

एन्जिला र अमृता सन् २०१४ देखि राष्ट्रिय खेलकुद टोलीको सदस्य रहँदै आएकी छन् । एन्जिलाले सन् २०१६ मा उनले राष्ट्रिय टोलीबाट डेब्यू गरेकी थिइन् । एन्जिला राष्ट्रिय टोली र एपिएफकी पहिलो रोजाईकी गोलकिपर हुन् । रक्षक अमृता नेपाल पुलिस क्लबकी हुन् । एन्जिला राष्ट्रिय टोलीको नवौं कप्तान हुन् । यसअघि रमा सिंह, कमला हिराचन, मीरा चौधरी, जमुना गुरुङ, चन्द्रा भण्डारी, अनु लामा, निरु थापा र रेनुकाले कप्तानी गरेका थिए ।

एन्जिलाले ४ वर्षअघि हिरो कपमा कार्यवहाक कप्तानको जिम्मेवारी निर्वाह गरिसकेकी थिइन् । दशरथ रंगशाला नेपालले भुटानसँग खेल्दै मंगलबार यसपटकको साफ च्याम्पियनसिपको सुरुवात गर्दैछ । समूह बीमा अर्को टोली श्रीलंका रहेको छ । अर्को समूहमा साविक विजेता भारत, पाकिस्तान, माल्दिभ्स र बंगलादेश रहेका छन् ।