एजेन्सी – इंग्लिस प्रिमियर लिगको निकै नै रोमाञ्चक र प्रतिस्पर्धात्मक हुने अनुमान गरिएको खेलमा आज (आइतबार) राति लिगमा शतप्रतिशत पाँचौ जित निकालेको आर्सनल र पछिल्लो समय जितको लयमा रहेको म्यानचेस्टर युनाइटेडबीच प्रतिस्पर्धा हुँदैछ ।

खेल म्यानचेस्टरको घरेलु मैदान ओल्ड ट्राफोर्डमा नेपाली समयअनुसार राति ९ः१५ बजे हुने छ । घरेलु मैदानमा हुने खेलमा युनाइटेड अपराजित रहेको आर्सनललाई हराउँदै लिगमा पहिलो हार चखाउने लक्ष्यमा मैदानमा उत्रनेछ । आर्सनल पनि युनाइटेडलाई उसकै मैदानमा हराउँदै आफ्नो शत प्रतिशत जितको यात्रालाई कायम राख्न चहान्छ ।

सुरुवाती दुई खेल गुमाएपनि पछिल्लो तीनै खेलमा सफलता हात पारेको युनाइटेड आर्सनलाई हराउँदै कम्तीमा शीर्ष चारमा उक्लने लक्ष्यमा हुनेछ । टोलीसँग मार्कस रासफोर्ड, ब्रुनो फर्नान्डेस, जेडान सान्चो, क्रिस्टियन एरिक्सन, क्यासमिरो, राफायल भरान, लिसान्द्रो मार्टिनेज, डिएगो डालोट र गोलरक्षक डेभिड हे गेया रहेका छन् ।

यता, आर्सनल पनि युनाइटेडलाई हराउँदै शत प्रतिशत जितसहित आफ्नो शीर्षतालाई थप मजवुत बनाउन चहान्छ । टोलीसँग लयमा रहेका गाब्रियल जेसस, गाब्रियल मार्टिनेली, बुकायो साका, ग्रानिट झाँका, विलियन सालिवा र गोलरक्षक आरोन राम्सडाले रहेका छन् ।

यि दुई टोलीबीचको पछिल्लो २७ खेलको नतिजा युनाइटेड हावी छ । युनाइटेडले १२ खेलमा सफलता हात पारेको छ । ८ खेल आर्सनलले जित्दा ७ खेल बराबरीमा सकिएको छ । पछिल्लो दुई खेलमा दुवै टोलीले समान एक खेल जितेका छन् ।