एजेन्सी – स्पेनिस ला लिगामा आज (शनिबार) राति विभिन्न चार खेलमा प्रतिस्पर्धा हुँदा क्याटलान क्लब बार्सिलोनाले सेभियासँग उसकै मैदानमा प्रतिस्पर्धा गर्दैछ ।

बार्सिलोना र सेभियाबीचको खेल नेपाली समयअनुसार राति १२:४५ बजे रामोन सान्चेज पिजुआन सेभियामा हुनेछ । बार्सिलोना घरेलु टोली सेभियालाई हराउँदै लिगमा आफ्नो अपराजित यात्रा कायमै राख्ने दाउमा हुनेछ ।

बार्सिलोनाले सुरुवाती तीन खेलमा दुई जित र एक बराबरीको नतिजा निकालेको छ । बार्सिलोना पहिलो खेलमै रायो भालेकानोसँग गोलरहित बराबरीमा रोकिदा त्यसपछि रियल सोसिडाड र रियल भालाडोलिडलाई पराजित गरेको छ ।

यही खेलमा जुल्स कुन्डेले आफ्नो पुर्व टोली सेभियाविरुद्ध मैदान उत्रने सम्भावना छ । उनी ला लिगामा दर्ता भइसकेका छन् । टोलीसँग रोबर्ट लेवान्डोस्की, औसमाने डेम्वेले, अन्सु फाती, गाभी, सर्जियो बुस्क्वेट्स, पेड्री, एरिक गार्सिया, रोनाल्ड एराउजो र गोलरक्षक मार्क आन्दर टेर स्टेगन रहेका छन् ।

यसबाहेक टोलीसँग मेम्फिस डिपाए, फेरान टोरेस, फ्रान्क केसी, फ्रान्की डि जोङ र जोर्डी अल्वा रहेका छन् । चेल्सीबाट आएका डिफेन्डरद्वय मार्काेस अलन्सो र आन्द्रेस क्रिस्टेन्सेन टोलीमा उपलब्ध हुने छैनन् ।

यता, कमजोर सुरुवात गरेको सेभिया पनि बार्सिलोनालाई स्तब्ध पार्दै ला लिगामा पहिलो जितको खोजीमा मैदान उत्रनेछ । सेभियाले ला लिगामा तीन खेल खेल्दा दुई हार र एक बराबरीको नतिजा निकालेको छ । सेभिया कुन्डेविना नै बलियो रहेको देखाउन चाहन्छ ।

टोलीसँग एरिक लमेला, राफा मिर, एलेसान्द्रो गोमेज, फर्नान्डो, जोन जोर्डन, ओलिभर टोरेस, एलेक्स टेलास, नेमान्जा डुडेल्ज, जेसस नाभास र गोलरक्षक यासिन बोनोउ रहेका छन् ।

यि दुई टोलीबीचको पछिल्लो ३६ खेलको नतिजामा बार्सिलोना २५ खेलमा विजयी भएको छ । चार खेल सेभियाले आफ्नो पक्षमा पार्दा ७ खेल बराबरीमा सकिएको छ । गत सिजन बार्सिलोनाले १–० को जित निकाल्दा एक खेल १–१ गोलको बराबरीमा सकिएको थियो ।