काठमाडौं (हाम्रो खेलकुद)– अर्को साता सुरु हुने महिला साफ च्याम्पियनसिपमा झण्डै ३ करोड ५० लाख रुपैयाँ खर्च हुने अखिल नेपाल फुटबल संघ (एन्फा) ले अनुमान गरेको छ । भदौ २१ गते सुरु हुने च्याम्पियनसिपका लागि तयारी पूरा भएको एन्फाले शुक्रबार पत्रकार सम्मेलनमार्फत जानकारी दिएको छ ।

दक्षिण एसियाका सातै राष्ट्रको सहभागिता रहने च्याम्पियनसिपमा नेपाल समूह बीमा श्रीलंका र भुटानसँग रहेको छ । अर्को समूहमा साविक विजेता भारत, पाकिस्तान, बंगलादेश र माल्दिभ्स छन् । प्रतियोगिता सञ्चालनमा ३ करोड ४७ लाख ६७ हजार ६ सय ८० रुपैयाँ खर्च हुने एन्फाको अनुमान छ ।

त्यसमध्ये सहभागी टोली र म्याच अफिसियलको खाना र बसोबासको खर्च दक्षिण एसियाली फुटबल महासंघ (साफ) ले बेहोर्ने छ । एन्फा प्रवक्ता सुरेश शाहका अनुसार मैदान तैयारी, स्थानिय यातायात र अन्य खर्च एन्फाले गर्नेछ । च्याम्पियनसिपका लागि साफले २ लाख ५० हजार अमेरिकी डलर उपलब्ध गराएको एन्फाले बताइएको छ ।

असार ६ गते निर्वाचित नयाँ एन्फा कार्यसमितिले पहिलो प्रतियोगिताका रुपमा साफ च्याम्पियनसिप आयोजना गर्दैछ । नेपालमा दोस्रो पटक आयोजना हुने च्याम्पिनसिप काठमाडौंमा भने पहिलो पटक हुँदैछ । यसअघिको संस्करण विराटनगरमा आयोजना भएको थियो । त्यसको फाइनलमा भारतले नेपाललाई ३–१ ले हराएको थियो ।

च्याम्पियनसिपमा भाग लिन भुटान र पाकिस्तानी टोली काठमाडौं आइसकेका छन् । भारत र माल्दिभ्सको टोली शनिबार तथा श्रीलंका र बंगलादेशको टोली आइतबार आइपुग्ने एन्फाले जानकारी दिएको छ । एन्फाले वरिष्ठ उपाध्यक्ष वीरबहादुर खड्काको संयोजकत्वमा १९ सदस्यीय मुल आयोजक समिति गठन गरिसकेको छ ।

एन्फाले च्याम्पियनसिपको टिकेटिङ, मार्केटिङ र ब्रोर्डकास्टिङ अधिकार भारतीय कम्पनी १०० स्पोर्टस् म्यानेजमेन्ट प्रालिसँग ६२ लाख रुपैयाँको सम्झौता गरिसकेको जनाएको छ । च्याम्पियनसिपका लागि दशरथ रंगशालाको भिआइपीतर्फ ५ सय र साधारणतर्फ ३ सय रुपैयाँ तोकेको छ ।

२३ सदस्यीय नेपाली टोली च्याम्पियनसिपको बन्द प्रशिक्षणमा रहेको छ । नेपाल र भुटानबीच भदौ २१ गते उद्घाटन खेल हुनेछ । राउन्ड रोविनका आधारमा हुने समूह चरणपछि शीर्ष २ टोली सेमिफाइनल पुग्नेछन् । फाइनल असोज ३ गते हुनेछ । च्याम्पिनसिपको प्रत्यक्ष प्रसारण एपी वान टेलिभिजनबाट हुने बताइएको छ ।