विराटनगर (हाम्रो खेलकुद) – पहिलो हाफमा लिएको २-० को अग्रता जोगाउन नसक्दा राष्ट्रिय टोलीका पूर्व खेलाडीले भरिएको हाटखोला भेट्रान क्लब मुस्ताङ विराट मेघा भेट्रान्स फुटबल प्रतियोगिताको क्वाटरफाइनलबाट बाहिरिएको छ ।

विराटनगरको सहिद रंगशालामा बुधबार भएको क्वाटरफाइनलमा मोरङ जहदाको जहदा भेट्रानले हाटखोलालाई टाइब्रेकरमा ५–४ गोल अन्तरमा पराजित गर्दै सेमिफाइनलमा पुगेको हो । निकै रोमाञ्चक खेलमा दुवै टोलीबाट अन्तर्राष्ट्रिय स्तरदेखि ए’ डिभिजन लिगको अनुभव बोकेका चर्चित खेलाडीहरु थिए ।

राष्ट्रिय टोलीका पूर्व कप्तान सागर थापाको नेतृत्वमा रहेको हाटखोलाले मध्यान्तरअघि २ गोलले अगाडि रहेपनि अग्रता जोगाउन सकेन । खेलको २० औं मिनेटमा हाटखोलाका विक्रम श्रेष्ठले गोल गर्दै टोलीलाई अग्रता दिलाए । ३५ औं मिनेटमा हाटखोलाकै राजकुमार घिसिङले गोल गर्दै अग्रतालाई दोब्बर बनाए ।

दोस्रो हाफको ४५ औं मिनेटमा डेनिम राईले गोल गर्दै जहदालाई खेलमा फर्काए । ६७ औं मिनेटमा डेनिम राईले पेनाल्टीमार्फत खेल बराबरीमा ल्याए । हाटखोलका गोलरक्षकले जहदाका सुवासलाई पेनाल्टी क्षेत्रभित्र लडाएपछि रेफ्री बिक्की कार्कीले पेनाल्टी दिएका थिए । निर्धारित समयमा दुवै टोलीबाट २–२ गोलको बराबरी भएपछि खेल टाइब्रेकरमा पुगेको थियो ।

टाइब्रेकरमा जहदाका लागि डेनिम राई, विमल गुरुङ, मित्रबहादुर बस्नेत, सुवास सब्बा र संजीव बुढाथोकीले गोल गरे । हाटखोलका लागि नरेश श्रेष्ठ, विक्रम श्रेष्ठ र राजकुमार घिसिङले गोल गरे भने विष्णु सुनारको प्रहारलाई गोलरक्षकले उत्कृष्ट बचाउ गरे ।

खेलको म्यान अफ द म्याच जहदाका डेनिम राईलाई मोरङ व्यापार संघका अध्यक्ष नवीन रिजालले पुरस्कार दिए ।
विराट मेघा स्पोर्ट्स एकेडेमीले आयोजना गरेको प्रतियोगिताअन्तर्गत बिहीबार रातिको पहिलो सेमिफाइनल खेल मोरङको सिद्राहा भेट्रान क्लब र आयोजकबीच हुनेछ । खेल साँझ ७ बजे सुरु हुनेछ ।