काठमाडौं (हाम्रो खेलकुद)– मछिन्द्र क्लबका उपाध्यक्ष अनिल श्रेष्ठ राष्ट्रिय पुरुष फुटबल टोलीको व्यवस्थापकमा नियुक्त भएका छन् । अर्को महिना नेपालले बंगलादेशविरुद्ध मैत्रीपूर्ण खेल खेल्दैछ ।

सहिद स्मारक ए डिभिजन लिग मछिन्द्र क्लबका उपाध्यक्ष समेत रहेका श्रेष्ठलाई अखिल नेपाल फुटबल संघ (एन्फा) ले व्यवस्थापकको जिम्मेवारी दिने तयारी गरिहेको छ । यद्दपी उनलाई पत्र भने दिन बाँकी रहेको एन्फाले जनाएको छ ।

एन्फा अध्यक्ष पंकज नेम्बाङलगायत पदाधिकारीले नै आफूलाई व्यवस्थापकको जिम्मेवारी लिन आग्रह गरेको जनाउँदै श्रेष्ठले भने,‘क्लबबाट खेल्दा जस्तै खेलाडीहरुले राष्ट्रिय टोलीबाट खेल्दा पनि सतप्रतिशत दिनका लागि प्रेरित गर्ने मेरो भूमिका रहन्छ । यो जिम्मेवारी मेरो लागि पनि मौका हो । सुधारात्मक परिवर्तन हुने गरि काम गर्छु ।’ यसअघि लामो समय एन्फाका तत्कालिन केन्द्रीय सदस्य मधुसुदन उपाध्यक्ष राष्ट्रिय टोलीको व्यवस्थापक थिए ।

पत्र लिन बाँकी रहेपनि एक वर्षका लागि आफूलाई व्यवस्थापकको जिम्मेवारी दिने सहमति भएको श्रेष्ठले बताए । श्रेष्ठको व्यवस्थापनमा मछिन्द्रले पछिल्लो सिजन सहिद स्मारक ए डिभिजन लिगको उपाधि जितेको थियो । उनी असार ६ गते भएको निर्वाचनमा कर्मा छिरिङ शेर्पाको प्यानलबाट सदस्य पदका प्रत्यासी थिए ।

दशरथ रंगशालामा असोज ११ गते हुने नेपाल र बंगलादेशबीच मैत्रीपूर्ण खेल तय भएको छ । एन्फाले ४० खेलाडीलाई समेट्दै प्रशिक्षण सञ्चालन गरिरहेको छ । व्यवसायिक फुटबल खेल्नका लागि इन्डोनेसिया रहेका रोहित चन्द, बहराइनमा रहेका मनीष डाँगी र देवेन्द्र तामाङबाहेक ३७ जना प्रशिक्षणमा सामेल छन् । प्रदीप हुमागाई मुख्य, युगलकिशोर राई सहायक प्रशिक्षक र विनोद डंगोल गोलकिपिङ प्रशिक्षकका रुपमा टोलीमा रहेका छन् ।