एजेन्सी – युरोपेली फुटबलका शीर्ष लिगहरु सुरु भइसकेका छन् । अधिकांश लिगमा टोलीले सुरुवाती ३ खेल खेलिसकेको अवस्था छ । तर यसका बाबजुद बार्सिलोना र म्यानचेस्टर सिटी सिजन सुरु भइसकेपछि पनि मैत्रीपूर्ण खेल खेल्दैछन् ।

बार्सिलोनाको घरेलु मैदान क्याम्प नोउमा आज हुने खेल नेपाली समयअनुसार मध्यरात १:१५ बजे सुरु हुनेछ । खेलका लागि सिटीको टोली बार्सिलोना पुगेर दुई दिन प्रशिक्षण गरिसकेको छ । प्रशिक्षक पेप गुआर्डिअ‍ोलाले यस खेलका लागि आफूले सिनियर टोलीकै खेलाडी उतार्ने वाचा गरिसकेका छन् ।

यता बार्सिलोनाले पनि सिनियर टोलीका खेलाडी नै उतार्नेछ । मैत्रीपूर्ण खेल भएकाले टोलीले चाहेजति खेलाडी परिवर्तन गर्न पाउँछन् । दुवै टोलीले यसपटक लिगमा खास अवसर नपाएका खेलाडीलाई धेरै समय दिने सम्भावना छ । चोटको जोखिम नहोस् भनेर निरन्तर खेलाडी परिवर्तन हुन सक्छ ।

सिजनको बिचमा मैत्रीपूर्ण खेल आयोजना गर्नुको कारण भने फरक रहेको छ । नशासम्बन्धि घातक रोग एम्योट्रोफिक ल्याटरल स्क्लेरोसिस (एएलएस) बारे सचेतना जगाउन खेल आयोजना गरिएको हो । यस खेलबाट संकलित रकम लुजोन फाउन्डेसनमा पनि दिइनेछ ।

यसबाहेक खेलमा पूर्व स्पेनिस तथा बार्सिलोना गोलरक्षक जोआन कार्लोस उन्जुएका लागि सहयोग रकम संकलन गरिनेछ । उनलाई सन् २०२० मा एएलएस देखिएको थियो । उनी पेप बार्सिलोना प्रशिक्षक रहँदा गोलरक्षक प्रशिक्षक पनि रहेका थिए ।