एजेन्सी – साविक विजेता रियल म्याड्रिडले स्पेनिस ला लिगामा सानदार जित निकालेको छ । रियलले सेल्टा डि भिगोमाथि ४–१ को सानदार जित दर्ता गरेको हो ।

सेल्टाको मैदानमा रियलको जितमा कप्तान करिम बेन्जेमा, लुका मोड्रिच, भिनिसियस जुयिनर र फेडे भाल्भेर्डेले गोल गरे । घरेलु टोलीका इयागो आसपासले एक गोल फर्काए ।

एवान्का बालाइडोस भिगोमा शनिबार राति भएको खेलको १४औं मिनेटमा कप्तान बेन्जेमाको पेनाल्टी गोलबाट रियलले सुरुवाती अग्रता लिएको थियो । रेनाटो तापियाले पेनाल्टी बक्सभित्र ह्यान्ड गर्न पुगेपछि रेफ्रीले पेनाल्टी प्रदान गर्दा बेन्जेमा चुकेनन् ।

२३औं मिनेटम इयागोले पेनाल्टीमार्फत नै गोल गर्दै खेललाई १–१ गोलको बराबरीमा ल्याए । इडर मिलिसाओले पेनाल्टी बक्समा ह्यान्ड गरेपछि रेफ्रीले सेल्टालाई पेनाल्टी प्रदान गर्दा आसपास चुकेनन् ।

४१औं मिनेटमा लुका मोड्रिचले गोल गर्दै रियललाई पहिलो हाफमा २–१ को अग्रता दिलाए । उनले डेभिड अलाबाको पासमा गोल गर्न सफल भएका थिए । ५६औं मिनेटमा भिनिसियसले मोड्रिचकै पासमा गोल गरेपछि रियल सहज जिततर्फ अग्रसर बन्यो ।

६६औं मिनेटमा फेडे भाल्भेर्डेले भिनिसियसको पासमा गोल गरेपछि रियल खेलमा ४–१ ले अघि बढ्यो । ८७औं मिनेटमा रियलले अर्काे पेनाल्टी प्राप्त गरेपनि परिवर्तित खेलाडी इडेन हाजार्डले गोल गर्न सकेनन् ।

ह्युगो मालोले पेनाल्टी बक्समा बेन्जेमालाई फउल गरेपछि रेफ्रीले रियललाई पेनालटी प्रदान गर्दा ८३औं मिनेटमा भिनिसियसको स्थानमा मैदान छिरेका हाजार्डले गोल गर्न सकेनन् । त्यसपछि थप गोल निस्कन नसक्दा रियल विजयी हुन सफल भयो ।

यस खेलमा ब्राजिली मिडफिल्डर क्यासमिरो इंग्लिस क्लब म्यानचेस्टर युनाइटेडमा जाने भएपछि उनलाई टोलीमा समेटिएको थिएन । सेल्टाविरुद्ध प्रशिक्षक कार्लाे एन्सेलोटीले फान्सेली युवा मिडफिल्डर ओरेलिएन चुआमेनीलाई मौका दिएको थियो । उनले आफ्नो भुमिकामा राम्रो छाप छोड्न सफल भए ।

लगातार दोस्रो जितसँगै रियल ६ अंक जोडेर शीर्षस्थानमा रहेको छ । समान ६ अंक नै रहेपनि रियल बेटिस र ओसासुना गोलअन्तरमा पछि छ । पराजित सेल्टा १ अंक जोडेर १४औं स्थानमा रहेको छ ।

अन्य नतिजा
ओसासुनाविरुद्ध क्याडिज (२–०) र मलोर्काविरुद्ध रियल बेटिस (१–२)