काठमाडौं (हाम्रो खेलकुद)– सातौं राष्ट्रिय खेलकुदको औपचारिक उद्घाटन हुनु ६ दिनअघि नै यस अन्तर्गतको महिला फुटबल भने सुरु भएको छ । पुस ११ गते देखि भारतको सिलगुढीमा हुने महिला साफ च्याम्पियनसिपमा नेपाली टोलीको सहभागिता रहने भएकोले सातौंको महिला फुटबल अगाडिबाटै सुरु गरिएको हो ।

सुनसरीको दुहबी रंगशालामा भएको उद्घाटन खेलमा शनिबार एपिएफ क्लबले विजयी भएको छ । समूह ‘क’ को उक्त लिग खेलमा एपिएफले पश्चिमाञ्चललाई ३–० ले हरायो । समूह ‘ख’ को खेलमा पूर्वाञ्चल र मध्यमाञ्चलले गोलरहित बराबरी खेले ।

पहिलो हाफमा कप्तान लक्ष्मी पौडेलले दुई गोल गरिन् भने अर्को गोल अनिता केसीले दोस्रो हाफमा गरिन् । लक्ष्मीले १२ औं र २२ औं मिनेटमा अर्को गोल गरिन् । ७० मिनेट खेलाइएको खेलको ५५ औं मिनेटमा अनिताले गोल गरे । प्रतियोगितामा पाँच विकास क्षेत्र र तीन विभागीय गरि आठ टोलीको सहभागिता रहेको छ । दुई समूहमा विभाजन गरी लिग कम नकआउट आधारमा प्रतिस्पर्धा भइरहेको छ । समूहका शीर्ष दुई टोली सेमिफाइनल पुगग्नेछन् ।

समूह ‘क’ मा पश्चिमाञ्चल र एपीएफसहित सुदूरपश्चिमाञ्चल र प्रहरी छन् । त्यस्तै समूह ‘ख’ मा पूर्वाञ्चल र मध्यमाञ्चल तथा मध्यपश्चिमाञ्चल र सेना रहेका छन् । महिला फुटबल पुस ९ गते नै समाप्त हुनेछ ।

राष्ट्रिय खेलकुद परिषद्का सदस्य–सचिव केशवकुमार विष्टले प्रतियोगिताको उद्घााटन गरे । सातौं राष्ट्रिय खेलकुदको औपचारिक उद्घाटन पुस ८ गते हुने भएपनि महिला फुटबल शनिबारैदेखि सुरु भएको हो । यसअघि सातौं राष्ट्रियअन्तर्गत पौडी, शारीरिक सुगठन र ट्रायथलन सम्पन्न भइसकेको छ । एथलेटिक्सको पनि म्याराथन भइसकेको छ ।

सातौं राष्ट्रिय खेलकुदमा आइतबार महिला फुटबल

सुदूरपश्चिमाञ्चलविरुद्ध नेपाल प्रहरी क्लब

मध्यपश्चिमाञ्चलविरुद्ध नेपाली सेना