एजेन्सी – यसै समरमा क्याटलान क्लब बार्सिलोना आएका पोलिस फरवार्ड रोबर्ट लेवान्डोस्कीले ला लिगा प्रतिद्वन्द्वी रियल म्याड्रिड र उनका फ्रान्सेली फरवार्डबारे केही नसोचेको बताएका छन् ।

‘म रियल म्याड्रिडविरुद्ध खेल्न सधैं तयार छु । उनीहरुविरुद्ध कसरी खेल्ने मलाई थाहा छ,’ लेवान्डोस्कीले भने, ‘गत सिजन उनीहरुले उत्कृष्ट र सफल समय व्यतित गरे । हामी उनीहरुलाई हराउन यहाँ छौं । हामीलाई थाहा छ यो गाह्रो हुनेछ । तर यो फुटबल हो ।’

‘रियल म्याड्रिडविरुद्ध मात्र होइन । हामी सबै सधैं तयार हुनुपर्छ किनभने त्यहाँ उत्कृष्ट क्लबहरु छन्,’ लेवान्डोस्कीले भने, ‘तपाईले सधैं आफ्नो उत्कृष्ट स्तरमा खेल्नुपर्छ । हामी हरेक खेल जित्न चहान्छौं । तर, यो चुनौतीपूर्ण हुनेछ ।’

‘म रियल म्याड्रिड र करिम बेन्जेमाको बारेमा सोचिरहेको छैन । एक उत्कृष्ट स्ट्राइकर जो वर्षौदेखि ला लिगामा छन् । मेरो लागि बार्सिलोनाबाट राम्रो खेल्नु महत्त्वपूर्ण हुनेछ । बेन्जेमासँग होइन,’ लेवान्डोस्कीले भने ।

लेवान्डोस्कीले आफ्नो अनुभव प्रयोग गरेर गत सिजन उपाधिविहीन बनेको जाभी हर्नान्डेजको बार्सिलोनालाई यो सिजन उपाधि जिताउन सहयोग गर्ने बताएका छन् । ‘उमेरले फर पार्दैन । यो अंक मात्र हो,’ लेवान्डोस्कीले भने, ‘म ३३ वर्षको महसुस गर्दिन । शारीरिक रुपमा राम्रो महसुस भइरहेको छ र मैले लगातार शीर्षस्तरमा खेलिरहेको जस्तो लाग्छ । मेरो अनुभवले टोलीलाई सकारात्मक प्रभाव पार्न सक्छ । टोलीसँग धेरै प्रतिभावान् र क्षमतावान् खेलाडी छन् ।’

‘अहिले सबै कुरा राम्रो चलिरहेको छ । हामीले सुरुदेखि नै हामी राम्रो अवस्थामा छौं भनेर देखाउनुपर्छ । टोलीको नेतृत्वदेखि व्यवस्थापनसम्म सबै राम्रो भइरहेको छ । प्रशिक्षक जाभीसँग पनि स्पष्ट योजना छ,’ लेवान्डोस्कीले भने, ‘प्रशिक्षकले मबाट के चाहन्छन् भन्ने मैले बुझेको छु । सोही कारण नै म बार्सिलोना आएको हुँ । प्रशिक्षकको स्पष्ट विचार छ ।’