एजेन्सी – म्यानचेस्टर युनाइटेडका नवनियुक्त प्रशिक्षक एरिक टेन हागले टोलीका स्टार फरवार्ड क्रिस्टियानो रोनाल्डोलाई प्रि-सिजनको घटनालाई लिएर आफूले गाली गरेको बताएका छन् ।

गत आइतबार युनाइटेडले ओल्ड ट्राफर्डमा रायो भालेकानोसँग मैत्रीपूर्ण खेल खेल्दा रोनाल्डो लगायत केही खेलाडी दोस्रो हाफ चलिरहँदा मैदान छाडेर बाहिरिएका थिए । खेलमा सुरुवात गरेका रोनाल्डो कमजोर प्रदर्शनपछि दोस्रो हाफमा परिवर्तन भएका थिए । दोस्रो हाफमा खेल्न नपाएपछि रोनाल्डो र त्यस दिनको खेलका लागि टोलीमा नरहेका केही खेलाडी मैदान छोडेर गएको खुलासा भएको थियो ।

प्रिमियर लिगको पहिलो खेलको पूर्वसन्ध्यामा पत्रकार सम्मेलनमा बोल्दै प्रशिक्षक टेन हागले यसबारे रोनाल्डोलाई आफूले गाली गरेको बताए । ‘मैले यसबारे टोलीमा रहेका खेलाडीलाई प्रष्ट भनेको छु । आउने दिनमा यसलाई सच्याउन भने र हामी अघि बढ्यौं,’ उनले भने ।

रोनाल्डोसँग यस विषयमा कसरि कुरा भयो भन्ने प्रश्नमा टेन हाग केही रिसाएर भने, ‘यसको मतलब के हो ? अब मैले को-को खेलाडी गए, सबैको बारेमा एक एक भन्नुपर्यो ? अन्य खेलाडी पनि बाहिरिएका थिए, तर रोनाल्डोलाई मात्र किन अघि सारियो ? यो ठिक होइन । रोनाल्डोजस्तो अन्य खेलाडी पनि छोडेका छन् ।’

रोनाल्डो र अन्य खेलाडीले मैदान छोड्नु ठिक थियो ? भन्ने प्रश्नमा टेन हागले उत्तर दिन चाहेनन् । ‘मलाई ल्गाच हामीले यसबारे चाहिने सब बोलेका छौं । त्यो ठिक थिएन । अब हामी अघि हेर्न चाहन्छौं,’ उनले थपे ।

रोनाल्डोले प्रि-सिजनमा म्यानचेस्टर युनाइटेडको अष्ट्रेलिया भ्रमण र प्रशिक्षण छुटाएका थिए । रोनाल्डोले क्लब छाड्न चाहेपनि उनलाई लिन इच्छुक क्लब नहुँदा उनी पुन: प्रशिक्षणमा सामेल भएका थिए । टेन हाग भने रोनाल्डो क्लबमा आउँदा आफू खुसी रहेको बताउँछन् ।

‘म धेरै खुसी छु । मैले यसअघि पनि भनेको थिएँ । रोनाल्डो उत्कृष्ट स्ट्राइकर हुन् । उनी टोलीमा रहनु र हाम्रो योजनाको पाटो हुन्,’ उनले थपे ।