काठमाडौं (हाम्रो खेलकुद) – साफ यू-२० च्याम्पियनसिप अन्तर्गत उपाधिका लागि फाइनलमा आयोजक तथा साविक विजेता भारत र बंगलादेश भिड्दैछन् । खेल आज साँझ ७:१५ बजे भुवनेश्वरस्थित कालिंगा रंगशालामा हुनेछ ।

बंगलादेश लिग विजेता बन्दै फाइनल प्रवेश गर्दा भारत दोस्रो स्थानमा रहेर फाइनल प्रवेश गरेको हो । लिग चरणमा बंगलादेश ४ खेलमा १० अंक जोड्दै शीर्षस्थानमा रहयो । भारतले ४ खेलमा ९ अंक जोड्दै दोस्रो स्थानमा रहेर फाइनलमा स्थान बनाएको थियो । नेपाल भने ४ खेलमा ७ अंकसहित तालिकाको तेस्रो स्थानमा रहयो । माल्दिभ्स ४ खेलमा २ अंकसहित चौथो तथा १ अंक जोडेको श्रीलंका पुछारमा रहयो ।

समूह चरणको खेलमा बंगलादेशले भारतलाई पराजित गर्दै सानदार सुरुवात गरेको थियो । त्यसयता भारतले लगातार तीन जित दर्ता गर्दै लय समातेको छ । बंगलादेश भने समूहको अन्तिम खेलमा नेपालसँग १-१ को बराबरीमा रोकिएको थियो । आजको खेलमा भारत समूह चरणको हारको बदला लिँदै उपाधि घरेलु भूमिमा राख्न चाहन्छ ।

दुवै टोलीले फाइनलमा एक-एक खेलाडीको साथ पाउने छैनन् । भारतका लागि उत्कृष्ट प्रदर्शन गरिरहेका विंगर पार्थिव गोगोई खेलमा उपस्थित हुने छैनन् । माल्दिभ्सविरुद्ध खेलको अन्त्यतिर रेफ्रीविरुद्ध अपशब्द बोलेपछि उनले रातो कार्ड पाएका थिए । त्यस्तै बंगलादेशका साहिदुल इस्लामले नेपालविरुद्ध खेलमा झगडा हुँदा रातो कार्ड पाएका थिए ।

भारतका प्रशिक्षक शंमुगम वेंकटेशले उपाधि जित्न भारत तयार रहेको बताए । ‘फाइनल खेल्नु ठूलो अवसर हो । मैले आफैं पनि सिनियर टोलीमा प्रशिक्षक र खेलाडीको रुपमा साफको उपाधि जितेको छु । फाइनलका लागि खेलाडी तयार छन् र उत्कृष्ट प्रदर्शन गर्ने विश्वास छ,’ उनले भने ।

बंगलादेशका प्रशिक्षक पल स्मलीले दुवै टोलीले एक अर्काको कमजोरी बुझेको कारण खेल रोमान्चक हुने बताए । ‘हामीले भारतसँग समूह चरणमा खेलेका छौं । हामीलाई उनीहरुको कमजोरी थाहा छ । उनीहरुलाई पनि हाम्रो बारेमा पक्कै थाहा हुनुपर्छ । खेल रोमान्चक हुनेछ,’ उनले थपे ।