काठमाडौं (हाम्रो खेलकुद) – अर्को महिना नेपालमा आयोजना हुने साफ महिला च्याम्पियनसिपका लागि अखिल नेपाल फुटबल संघ (एन्फा) ले दोस्रो चरणको छनोटमा ३५ खेलाडीको नाम सार्वजनिक गरेको छ ।

नेपाली महिला राष्ट्रिय टोलीका प्रशिक्षक कुमार थापाले पहिलो चरणमा सहभागी ५८ खेलाडीबाट ३५ सदस्यीय टोली घोषणा गरेका हुन् । पहिलो चरणको टोलीबाट कप्तान रेनुका नगरकोटेको नाम दोस्रो चरणबाट भने बाहिर राखिएको छ । टोलीमा अब सिनियर खेलाडीमा एन्जिला सुब्बा, सावित्रा भण्डारी र अमृता जैशी रहेका छन् । टोलीको अर्को कप्तान यिनै मध्यबाट छानिने सम्भावना छ ।

दशरथ रंगशालामा हुने प्रतियोगिता भदौ २१ देखि असोज ३ गतेसम्म चल्नेछ । नेपाल रहेको समूह बी मा भुटान र श्रीलंका रहेका छन् । आयोजक नेपालले उद्घाटन खेलमा भुटानको सामना गर्नेछ । खेल भदौ २१ गते साँझ ५:३० बजे हुनेछ । दोस्रो तथा समूह चरणको अन्तिम खेलमा नेपालले भदौ २८ गते श्रीलंकासँग खेल्नेछ ।

भदौ ३१ गते सेमिफाइनलका दुई खेल हुनेछ । त्यसपछि असोज ३ गते फाइनल हुनेछ । सहभागी ७ टोलीलाई दुई समूहमा विभाजन गरेको छ । समूह चरणको खेलपछि समूहको शीर्ष दुई टोलीले सेमिफाइनलमा स्थान बनाउने छन् । यस्तै समूह ‘ए’ मा साविक विजेता भारत, माल्दिभ्स, बंगलादेश र पाकिस्तान छन् ।

नेपालको ३५ सदस्यीय टोली :

गोलरक्षक : एन्जिला तुम्बापो सुब्बा, अन्जना रानामगर, उषा नाथ, कविता विक

डिफेन्डर : हिराकुमारी भुजेल, सिर्जना सिंह ठकुरी, गंगा गुरुङ, अमृता जैशी, गीता राना, पुजा राना, पुनम जर्घा मगर, निशा थोकर, सिर्जना चेम्जोङ, विमला विक, समिक्षा घिमिरे

मिडफिल्डर : विमला चौधरी, मन्जली कुमारी योन्जन, सविता रानामगर, प्रिती राई, सरु लिम्बु, दिपा राई, दिपा शाही, इन्दिरा राई, सरस्वती ऐर, अनिता बस्नेत, हिमा चौधरी, कुसुम खतिवडा

फरवार्ड : सावित्रा भण्डारी, अमिषा कार्की, रेखा पौडेल, अनिता केसी, रश्मीकुमारी घिसिङ, रजनी थोकर, निर्मला विक, चन्द्रा भण्डारी