काठमाडौं (हाम्रो खेलकुद) – नेपाली यू२० राष्ट्रिय फुटबल टोलीले साफ यू२० च्याम्पियन्सिप अन्तर्गत आइतबार साविक विजेता भारतसँग ८-० को हार बेहोर्यो । फराकिलो हारका बाबजुद नेपालको फाइनल पुग्ने सम्भावना भने जिवित रहेको छ ।

नेपालले प्रतियोगिताको सुरुवाती दुई खेलमा गोल नखाएपनि भारतविरुद्ध भने सोच जस्तो प्रदर्शन गर्न सकेन । पहिलो हाफमा खेल प्रतिस्पर्धात्मक नै थियो । गोलरक्षकको गल्तीमा भारतले अग्रता लिँदा पहिलो हाफ १-० मा सकियो । दोस्रो हाफमा नेपालविरुद्ध ७ गोल थप्दै भारतले फाइनल पुग्न बलियो दावेदारी प्रस्तुत गर्यो ।

यस हारसँगै नेपाल अंक तालिकाको तेस्रो स्थानमा झरेको छ । बंगलादेश ३ खेलमा ९ अंकका साथ शीर्ष स्थानमा छ । नेपाल र भारतको समान ३ खेलमा ६ अंक भएपनि हेड टु हेडमा भारत अघि छ । १-१ अंक जोडेका माल्दिभ्स र श्रीलंका प्रतियोगिताबाट बाहिरिएका छन् ‌‌।

हार बेहोरेपनि नेपाल प्रतियोगिताको फाइनल प्रवेश गर्ने सम्भावना भने जिवित छ । नेपालले बंगलादेशलाई ५ गोलको अन्तरले पराजित गरे फाइनलमा स्थान पक्का गर्नेछ । बंगलादेशसँग बराबरी भएको खण्डमा भने भारत माल्दिभ्ससँग पराजित भए नेपाललाई पुग्छ । माल्दिभ्स र भारत बराबर भए नेपालले बंगलादेशलाई १ गोलले हराए पनि पुग्नेछ ।

मंगलबार हुने खेलमा नेपालले बंगलादेश तथा भारतले माल्दिभ्सको सामना गर्नेछ । फाइनल खेल शुक्रबार हुनेछ ।