काठमाडौं (हाम्रो खेलकुद) – साफ यू२० च्याम्पियन्सिप अन्तर्गत समूह चरणको तेस्रो खेलमा भारतले नेपालविरुद्ध सुरुवाती अग्रता लिएको छ । पहिलो हाफमा भारत १-० ले अघि छ ।

खेलको ३२ अ‍ौं मिनेटमा टाइसन सिंह लोइटङबमले भारतका लागि गोल गरेका हुन् । नेपालका गोलरक्षक इश्वर गुरुङको गल्तीको फाइदा उठाउँदै उनले गोल गरे । बायाँ विंगबाट आएको क्रस विना कुनै दवाव समाउने क्रममा इश्वरको हातबाट फुस्किएको थियो । उक्त बल भुइँमा नझर्दै टाइसनले हेडरमार्फत गोल गरे ।

त्यसअघि खेलको सुरुवातबाट नै भारतले नेपालमाथि दवाव कायम गरेको थियो । विंगबाट अधिकांश आक्रमण बुनेको भारतविरुद्ध नेपाली डिफेन्स व्यस्त देखिएको छ । नेपालले आक्रमण बुन्ने प्रयास गरेपनि भारतीय गोलरक्षकलाई समस्या दिन सकेको छैन ।

आजको खेलमा नेपालले पछिल्लो खेलबाट एक परिवर्तन गरेको छ । सन्दीप कार्कीको स्थानमा मनग्य नकर्मी टोलीमा आएका छन् । उनी श्रीलंकाविरुद्ध पनि दोस्रो हाफमा मैदान छिरेर गोल गरेका थिए ।

टोलीसँग सिनियर राष्ट्रिय टोलीबाट अनुभव बटुलिसकेका मिडफिल्डर तथा टोलीका कप्तान आयुष घलानको साथ रहेको छ । आयुषसँगै अग्रपङ्तिमा मनग्य नकर्मी र सुगम सुवालले दुवै खेलमा उत्कृष्ट प्रदर्शन गरेका थिए । दिपेश गुरुङ, कृतिश रत्न छुन्जु र आशिष राई मिडफिल्डमा छन् । सुमित श्रेष्ठ, अजय चौधरी, अमर श्रेष्ठ, अभिषेक वाइवाले गोलरक्षक इश्वर गुरुङलाई साथ दिनेछन् । मनग्य नकर्मीले बेन्चबाट आएर पछिल्लो दुवै खेलमा गोल गरेका थिए ।

राउन्ड रोविन लिगको तीन चरणको खेल जारी रहँदा बंगलादेश तीन खेलमा तीन जितसहित ९ अंक जोडेर शीर्षस्थानमा रहेको छ । नेपाल दुई खेलमा दुई जितसहित ६ अंक जोडेर दोस्रो स्थानमा रहेको छ । भारत दुई खेलमा ३ अंक जोडेर तेस्रो स्थानमा रहँदा माल्दिभ्स र श्रीलंकाको १-१ अंक छ ।

आज भएको पहिलो खेलमा १-१ को बराबरी‌ खेलेपछि दुवै टोली बाहिरिएका हुन् ।नेपालले राउन्ड रोविन लिगको अन्तिम खेलमा मंगलबार बंगलादेशको सामना गर्नेछ । राउन्ड रोविन लिगपछि शीर्ष दुई टोलीले उपाधिका लागि २० साउनमा प्रतिस्पर्धा गर्नेछन् ।

नेपालको सुरुवाती ११ : इश्वर गुरुङ, अजय चौधरी, अमर श्रेष्ठ, अभिषेक वाइवा, दिपेश गुरुङ, कृतिश रत्न छुन्जु, मनग्य नकर्मी, सुमित श्रेष्ठ, आशिष राई, सुगम सुवाल, आयुष घलान (कप्तान)