एजेन्सी – जर्मन महारथी बायर्न म्युनिख जर्मन सुपर कप च्याम्पियन बनेको छ । बुन्डेसलिगा प्रतिद्धन्द्धी आरबी लाइप्जिगलाई ५–३ ले पराजित गर्दै बायर्न च्याम्पियन बनेको हो ।

रेड बुल एरिना लाइप्जिगमा शनिबार राति भएको खेलमा बायर्नलाई च्याम्पियन बनाउन जमल मुसिएला, साडियो माने, बेन्जामिन पाभार्ड, सर्ज जिनाब्री र लिरोए सानेले गोल गरे । लाइप्जिगका मार्सेल हाल्सटेनवर्ग, क्रिस्टोफोर एनकुुकु र ड्यानियल ओल्मोले गोल फर्काए ।

गोलको वर्षा भएको खेलको १४औं मिनेटमा जमल मुसिएलाको गोलबाट बायर्नले सुरुवाती अग्रता लिएको थियो । उनले लुकास हर्नान्डेजको पासमा गोल गर्न सफल भएका थिए । ३१औं मिनेटमा जिनाब्रीको पासमा मानेले गोल गर्दै बायर्नको अग्रता दोब्बर पारे ।

पहिलो हाफको इन्ज्युरी समयको थप गरिएको पहिलो मिनेटमा पाभार्डले मुसिएलाको पासमा गोल गरेपछि बायर्न खेलमा ३–० ले अघि बढ्यो । ५९औं मिनेटमा मार्सेल हाल्सटेनवर्गले गोल गर्दै लाइप्जिगलाई खेलमा फर्कने संकेत दिए । ६६औं मिनेटमा जिनाब्रीले गोल गरेपछि बायर्न सहज जिततर्फ अग्रसर बन्यो ।

७७औं मिनेटमा क्रिस्टोफोर एनकुुकुले पेनाल्टीमा गोल गर्दै खेललाई ४–२ को स्थितिमा ल्याए । ८९औं मिनेटमा ड्यानियल ओल्मोले गोल गर्दै खेललाई ४–३ को रोमाञ्चक स्थितिमा ल्याए । तर इन्ज्युरी समयको थप गरिएको आठौं मिनेटमा लिरोए सानेले अलफन्सो डाभिसको पासमा गोल गर्दै बायर्नलाई च्याम्पियन बनाए ।

नयाँ सिजनमा बायर्नको यो पहिलो उपाधि हो । अब एक सातापछि बुन्डेसलिगासँगै अन्य घरेलु प्रतियोगिता शुरु हुनेछ । जर्मन सुपर कप बुन्डेसलिगा च्याम्पियन र डिएफवी पोकल च्याम्पियनबीच नयाँ सिजन शुरु हुनुअघि खेल्ने प्रावधान छ ।

सुपरकपको सर्वाधिक सफल बायर्नले लगातार तेस्रो पटक तथा समग्रमा १०औं पटक उपाधि जितेको हो । यसअघि बायर्नले १९८७, ९०, ०१०, १२, १६, १७, १८, २० र २१ म उपाधि जितेको थियो । बायर्न भन्दा पछि बोरुसिया डर्टमुन्डले ६ पटक उपाधि जितेको छ ।