एजेन्सी – ब्राजिली विंगर फरवार्ड गाब्रियल जेससको ह्याट्रिक मद्दतमा लन्डन क्लब आर्सनलले प्रि–सिजनको मैत्रीपूर्ण खेलमा सानदार जित निकालेको छ ।

आर्सनलले घरेलु मैदानमा स्पेनिस प्रतिद्धन्द्धी सेभियामाथि ६–० को सानदार जित निकालेको हो । आर्सनलको जितमा यसै समरमा क्लबमा आएका जेससले ह्याट्रिक पूरा गर्दा बुकायो साकाले दुई तथा इडुआर्ड एनकेइटाले एक गोल थपे ।

इमिरेट्स स्टेडियम लन्डनमा शनिबार राति भएको एकपक्षीय खेलको १९ मिनेटभित्रै ४–० को आरामदायी अग्रता लिन सफल भएको थियो । आर्सनलले ९ मिनेटको अन्तरमा चार गोल गन सफल भएको थियो ।

१०औं मिनेटमा बुकायो साकाले पेनाल्टीमा गोल गर्दै आर्सनलको गोलको खाता खोले । १३औं मिनेटमा जेससले गोल गर्दै आर्सनलको अग्रता दोब्बर पारे । १५औं मिनेटमा जेससले व्यक्तिगत दोस्रो तथा टोलीका लागि तेस्रो तथा १९औं मिनेटमा साकाले व्यक्तिगत दोस्रो तथा टोलीका लागि चौथो गोल गरेपछि आर्सनल खेलमा ४–० को आरामदायी स्थितिमा अघि बढ्यो ।

७७औं मिनेटमा जेसस ह्याट्रिक पूरा गर्दा आर्सनल खेलमा ५–० ले अघि बढ्यो । आर्सनल यतिमै रोकिएन । ८८औं मिनेटमा परिवर्तित खेलाडी एनकेइटाले गोल गर्दै आर्सनलको फराकिलो जित सुनिश्चित गरे । एनकेइटा ७९औं मिनेटमा साकाको स्थानमा मैदान छिरेका थिए । मुख्य डिफेन्डर जुल्स कुन्डेले क्लब छाडेपछि सेभियाको रक्षापङ्ति निकै फितलो बनेको थियो ।

प्रि–सिजनका आर्सनलको यो लगातार पाँचौ जित हो । यसअघि आर्सनलले नर्नवर्गलाई ५–३, एभर्टनलाई २–०, ओर्लान्डो सिटीलाई ३–१ र चेल्सीलाई ४–० ले पराजित गरेको थियो ।