काठमाडौं (हाम्रो खेलकुद) – साफ यू-२० च्याम्पियनसिप अन्तर्गत समूह चरण अन्तर्गत दुई खेल पूरा हुँदा नेपाल शीर्षस्थानमा छ । लगातार दोस्रो जितसहित नेपाल अंक तालिकाको शीर्षस्थानमा रहेको छ ।

दक्षिण एसियाली फुटबल महासंघ (साफ) क्षेत्रका ५ टोली सहभागी प्रतियोगितामा सबै टोलीले एक अर्कासँग समूह चरणमा खेल्नेछन् । समूहका शीर्ष दुई टोलीले फाइनलमा उपाधिका लागि प्रतिस्पर्धा गर्नेछन् । फाइनल अगस्ट ५ तारिखमा हुनेछ । हालसम्म नेपाल र बंगलादेशले खेलेका दुवै खेल जित्दै फाइनल पुग्ने बलियो सम्भावना बनाएका छन् । साविक विजेता तथा आयोजक भारत, माल्दिभ्स र श्रीलंका भने अंकविहिन छन् ।

भारतले अहिलेसम्म एक खेल मात्र खेलेको छ । बुधबार भएको पहिलो खेलमा भारत बंगलादेशसँग २-१ ले पराजित भएको थियो । त्यसअघि सोमबार बंगलादेशले श्रीलंकालाई १-० ले हराएको थियो । नेपालले आफ्नो पहिलो खेलमा माल्दिभ्सलाई ४-० र आज बुधबार भएको खेलमा श्रीलंकालाई ३-० ले हराएको थियो ।

प्रतियोगिताको समिकरण हेर्दा अब भारत फाइनल पुग्ने वा नपुग्ने छिनोफानो नेपालकै हातमा रहेको छ । नेपालले समूह चरणको अर्को खेलमा ३१ जुलाईमा भारतको सामना गर्नेछ । उक्त खेलमा भारतलाई पराजित गरे नेपाल फाइनलमा पुग्नेछ । यो मात्र होइन नेपालको जितले भारतको फाइनल पुग्ने सम्भावना पनि बन्द हुनेछ । कारण अन्य २ खेलमा भारतले समान ६ अंक जोडेपनि हेड टु हेडमा बंगलादेश अगाडि छ ।

नेपाल र भारतको खेल बराबरी भएको अवस्थामा भने नेपाल फाइनल पुग्ने सम्भावना बलियो बन्नेछ । त्यसो भएको खण्डमा भारतले आफ्नो र अन्य टोलीको अर्को नतिजा कुर्नुपर्ने हुन्छ । नेपाल वा बंगलादेशले अर्को खेल जितेमा भारतको फाइनल पुग्ने सम्भावना सकिनेछ ।

भारतले नेपाललाई पराजित गरेको अवस्थामा भने नेपाल र बंगलादेशको खेल सेमिफाइनल सरहको हुनेछ । फाइनल समिकरणका लागि अन्य खेलको नतिजा पनि हेर्नुपर्ने हुन्छ ।

अहिलेको स्थितिमा नेपालको २ खेलबाट ६ अंकसाथ अंक तालिकाको शीर्षस्थानमा छ । दोस्रो स्थानको बंगलादेशको पनि ६ अंक रहेको छ । गोलअन्तरमा नेपालले बंगलादेशलाई पछि पारेको हो । भारत, माल्दिभ्स र श्रीलंकाले भने अंकको खाता खोलेका छैनन् । लिग चरणपछि शीर्ष दुई टोलीले फाइनलमा प्रतिस्पर्धा गर्नेछ । नेपालले अब ३१ जुलाईमा भारतको सामना गर्नेछ । बंगलादेशसँग खेल २ अगस्टमा छ । फाइनल ५ अगस्टमा हुनेछ ।

यो पनि पढ्नुहोस : श्रीलंकालाई हराउँदै नेपाल फाइनलनजिक