काठमाडौं (हाम्रो खेलकुद) – साफ यू २० मा आयोजक समेत रहेको साविक विजेता भारत पहिलो खेलमै पराजित भएको छ । भुवनेश्वरको कालिंगा रंगशालामा बुधबार भएको खेलमा बंगलादेशले भारतलाई २–१ ले पराजित गर्दै च्याम्पियनसिपमा बलियो दाबेदारी प्रस्तुत गरेको छ ।

बंगलादेशको यो लगातार दोस्रो जित हो । पहिलो खेलमा बंगलादेशले श्रीलंकालाई १–० ले हराएको थियो । अर्को खेलमा भने नेपालले माल्दिभ्सलाई ४–० ले हराएको थियो । आजै हुने अर्को खेलमा नेपाल र श्रीलंकाबीच प्रतिस्पर्धा हुनेछ ।

बंगलादेशलाई महत्वपूर्ण जित दिलाउन मोहम्मद अहमत नोभाले २ गोल गरेका थिए । भारतका लागि हिमांशु झांग्राले गोल गरेका थिए । नोभाले २९ औं मिनेटमा पहिलो गोल गरेका थिए । उनले गोलरक्षक र डिफेन्सको समन्वयको कमजोरीको फाइदा उठाउँदै अग्रता दिलाएका थिए ।

भारतका लागि हिमांशुले ३५ औं मिनेटमा बराबरी गोल गरेका थिए । परिवर्तित खेलाडीका रुपमा मैदान प्रवेश गरेको दुई मिनेटमा नै हिमांशुले बराबरी गोल गरेका थिए । पहिलो हाफको इन्जुरी समयमा नोभाले अर्को गोल गर्दै बंगलादेशको जितको आधार तयार पारेका थिए ।

५ राष्ट्रको सहभागिता रहेको च्याम्पियनसिपको ३ खेल सकिदा बंगलादेशको ६ अंक, नेपालको ३ अंक छ । भारत, श्रीलंका र माल्दिभ्स अंक विहिन छन् । राउन्ड रोविन लिगपछि शीर्ष २ टोलीबीच फाइनल हुनेछ ।