एजेन्सी – लिभरपुल र बार्सिलोनाका पूर्व फरवार्ड लुइस सुआरेज आफ्नो पूर्व क्लब फर्कने भएका छन् । सुआरेज आफ्नो पहिलो क्लब नासियोनलमा पुनः आबद्ध हुने प्रारम्भिक सम्झौता गरेका छन् ।

सुआरेज १६ वर्षपछि आफ्नो पूर्व क्लब फर्कने भएका हुन् । आधिकारिक सम्झौता हुन बाँकी छ । क्लबले केही दिनमा नै उनलाई सार्वजनिक गर्ने योजना बनाएको छ ।

यस समरसँगै स्पेनिस क्लब एट्लेटिको म्याड्रिडमा आफ्नो सम्झौता सकिएसँगै ३५ वर्षीय सुआरेज फ्रि एजेन्ट बनेका थिए । सामाजिक सञ्जालको एक भिडियोमा उनले चाँडै सहमतिमा पुग्ने आशा गरेका छन् ।

सुआरेज करिव २० हजार समर्थकमाँझ नासियोनलमा जोडिएको भिडियो सार्वजनिक भएको छ । उनी मास्कमा देखिएका छन् । सुआरेज सन् २००५ मा १८ वर्षको उमेरमा नासियोनलका लागि आफ्नो व्यावसायिक डेब्यु गरेका थिए । जसलाई उरुग्वेली लिगको उपाधि जिताएका थिए । त्यसपछि उनी ग्रोनिन्जेनमा आबद्ध भएका थिए ।

सर्वप्रथम म म र मेरो परिवारलाई पछिल्ला केही दिनहरूमा देखाइएको ठूलो स्नेहको लागि धन्यवाद भन्न चाहन्छु ।’ सुआरेजले भने, ‘नासियोनलमा फर्कने सम्भावनालाई अस्वीकार गर्न सकिदैन । प्रारम्भिक सम्झौता भइसकेको छ ।’

ग्रोनिन्जेनमा एक सिजन बिताएपछि उनी डच क्लब आयाक्स पुगेका थिए । आयाक्समा साँढे तीन सिजन बिताएपछि उनी इंग्लिस क्लब लिभरपुलमा अनुबन्धित भएका थिए । लिभरपुलमा पनि साँढे तीन सिजनको बसाईपछि उनी २०१४–१५ को सिजनमा क्याटलान क्लब बार्सिलोनामा अनुबन्ध भएका थिए ।

बार्सिलोनामा ६ सिजन बिताएका उनी २०२०–२१ को सिजनमा स्पेनिस क्लब एट्लेटिको म्याड्रिडमा पुगेका थिए । एट्लेटिकोमा दुई सिजन बिताएपछि उनी फ्रि एजेन्ट बनेका थिए ।

सन् २०११ मा उरुग्वेबाट कोपा अमेरिका जितेका सुआरेजले नासियोनलको उरुग्वेली लिग जितेका छन् । आयाक्सबाट डच लिग र डच कप, लिभरपुलबाट फुटबल लिग कप, बार्सिलोनाबाट चारपटक स्पेनिस ला लिगा, चारपटक कोपा डेल रे, दुईपटक सुपर कोपा, एक पटक च्याम्पियन्स लिग, फिफा क्लब विश्वकप र सुपर कप जितेका छन् । एट्लेटिकोबाट एक पटक ला लिगा जितेका छन् ।