एजेन्सी – युरोपेली च्याम्पियन रियल म्याड्रिड प्रि सिजनको मैत्रीपूर्ण खेलमा मेक्सिकन टोली क्लब अमेरिकासँग बराबरीमा रोकिएको छ । रियल म्याड्रिड २-२ को बराबरीमा रोकिँदा करीम बेन्जेमा र इडेन हाजार्डले १-१ गोल गरे ।

रियल खेलको पाँचौ मिनेटमा नै पछि परेको थियो । हेनरी मार्टिनले क्लब अमेरिकालाई अग्रता दिलाए । उनले पेनाल्टी क्षेत्र भित्र गरेको प्रहार गोलरक्षक आन्द्रीए लुनिनले बचाउन सकेका थिएनन् । त्यसपछि रियलले एकपछि अर्को आक्रमण बुनेपनि अमेरिकाका गोलरक्षक गिलेर्मे ओचोआले केही राम्रो बचाउ गरे ।

रियलले २२ औं मिनेटमा बराबरी गोल फर्कायो । चोटबाट ठिक भएपछि पहिलो पटक मैदान उत्रेका बेन्जेमाले सुन्दर गोल गरेका थिए । उनले मार्को एसेन्सियोसँग वन टु पास खेल्दै पेनाल्टी क्षेत्र बाहिरबाट दर्शनीय गोल गरे ।

दोस्रो हाफमा रियलले हाजार्डको गोलमा अग्रता लियो । क्लब अमेरिकाका खेलाडीले पेनाल्टी क्षेत्रभित्र लुकास भाज्केजलाई लडाएपछि रेफ्रीले पेनाल्टी दिएका थिए । हाजार्डले त्यसलाई गोलमा परिणत गर्दै रियललाई अघि बढाए ।

तर खेलको १० मिनेट बाँकी हुँदा खेल पुन: बराबरीमा आयो । क्लब अमेरिकाका अल्भारो फिदाल्गोले पेनाल्टीमा गोल गरे । उनको पहिलो प्रहार गोलरक्षक लुनिनले बचाएपनि रेफ्रीले गोलरक्षक अघि बढेका कारण पुन: प्रहार गर्न लगाएका थिए ।

रियलको प्रि-सिजनमा यो दोस्रो खेल थियो । पहिलो खेलमा बार्सिलोनासँग १-० को हार बेहोरेको टोलीले दोस्रो खेलमा पनि जित हासिल गर्न सकेन । रियलले अब अमेरिका भ्रमणको अन्तिम खेल ३० जुलाईमा युभेन्टससँग खेल्नेछ ।

यो पनि : बार्सिलोना र युभेन्टसको बराबरी