बायर्नको सानदार जित

एजेन्सी – जर्मन क्लब बायर्न म्युनिखले प्रि–सिजनको मैत्रीपुर्ण खेलमा सानदार जित दर्ता गरेको छ । बायर्नले डिसी युनाइटेडमाथि ६–२ को सानदार जित निकालेको हो ।

अमेरिकामा बिहीबार बिहान भएको खेलका बायर्नको जितमा साडियो माने, मार्सेल सवित्जर, सर्ज जिनाब्री, म्याथ्थिज डि लेग्ट, योसुवा जिर्कजी र थोमस मुलरले गोल गरे । डिसी युनाइटेडका स्केज सिमोनसेन र थियोडोर कुडिपिट्रोले गोल फर्काए ।

औडी फिल्ड वासिङटनमा भएको खेलको पाँचौ मिनेटमा साडियो मानेको पेनाल्टी गोलबाट बायर्नले सुरुवाती अग्रता लिएको थियो । १२औं मिनेटमा मार्सेल सवित्जरले गोल गर्दै बायर्नको अग्रता दोब्बर पारे । ४४औं मिनेटमा सर्ज जिनाब्रीले गोल गरेपछि बायर्न पहिलो हाफमा ३–० ले अघि बढ्यो ।

४७औं मिनेटमा म्याथ्थिज डि लेग्टले गोल गरेपछि बायर्न खेलमा ४–० ले अघि बढ्यो । ५२औं योसुवा जिर्कजीले गोल गरेपछि बायर्न फराकिलो जिततर्फ अग्रसर बन्यो । ५४औं मिनेटमा स्केज सिमोनसेनले गोल गर्दै खेललाई ५–१ को स्थितिमा ल्याए ।

८३औं मिनेटमा थियोडोरले गोल गरेपछि खेल ५–२ को स्थितिमा ल्याए । त्यसपछि इन्ज्युरी समयको थप गरिएको दोस्रो मिनेटमा थोमस मुलरले गोल गर्दै बायर्नलाई फराकिलो जित दिलाए ।