काठमाडौं (हाम्रो खेलकुद)– अखिल नेपाल फुटब संघ (एन्फा)को स्थगित भएको कार्यसमितिको दोस्रो बैठक बिहीबार हुने भएको छ । बैठक बिहीबार विहान ७ः०० बजे सुरु हुने एन्फाले आफ्नो वेभसाइडमार्फत मंगलबार जानकारी दिएको छ ।

एन्फा अध्यक्ष पंकजविक्रम नेम्बाङ अस्वस्थ भएपनि सोमबारका लागि तय भएको बैठक स्थगित भएको थियो । रक्तचाप बढेपछि नेम्बाङलाई मेडिसिटी अस्पताल भर्ना गरिएको थियो । सोमबार राती ९ः०० बजे उनी डिस्चार्ज भएका थिए ।

एन्फा बैठकका लागि विविध बाहेक १७ वटा एजेन्डा तय भएका छन् । उप महासचिव, प्रमुख कार्यकारी अधिकृत (सिइओ), प्रवक्ता नियुक्तीलाई महत्वका साथ हेरिएको थियो । एन्फाका महासचिव किरण राईले असार २४ गते ११ एजेण्डासहितको पत्र पदाधिकारी र सदस्यहरुलाई पठाएका थिए ।

पछि एन्फाका दुई उपाध्यक्ष दिर्घबहादुर केसीले ५ र दीपक खतिवडाले १ एजेन्डा थप्न माग गरेपछि एजेण्डा १७ पुगेको थियो । खतिवडाले एक मात्र एजेण्डाका रुपमा सिइओ र प्रवक्ता नियुक्ती समेट्न माग राखेका थिए । केसीले भने विशेष साधारणसभा देखि महिला लिगको दोस्रो चरण आयोजना लगाएतका विषयलाई थप्न आग्रह गरेका थिए ।

एन्फा उपाध्यक्ष खतिवडाले एसियाली फुटबल महासंघ (एएफसी) का पूर्व कर्मचारी गौरव थापालाई सिइओ र पूर्व केन्द्रिय सदस्य सुरेश शाहलाई प्रवक्ता नियुक्त गर्न आफूले बैठकमा प्रस्ताव राख्ने बताएका थिए । पछिल्लो समय थापालाई सिइओ भन्दा पनि सहायक महासचिवका रुपमा प्रस्ताव गर्ने तयारी भइरहेको एन्फाका एक पदाधिकारी बताए । उनले भनेका छन्‘ सिइओका लागि लामो प्रक्रिया लाग्ने भएकाले गौरव थापालाई सहायक महासचिव बनाउनेमा तयारी भइरहेको छ ।’

गौरव फिफाको १० वर्षे प्रतिबन्ध खेपिरहेका एन्फाका पूर्व अध्यक्ष गणेश थापाका छोरा हुन् । पूर्व अध्यक्ष थापाकै दबाबमा गौरवलाई एन्फा प्रवेश गराउने तयारी भइरहेको छ । जसका लागि एन्फा अध्यक्ष नेम्बाङमाथि दबाब बढाइराखिएको एन्फा भित्रै चर्चा चलेको छ ।

निर्वाचन अघि नै अरुणमान जोशी र बसन्त अर्याललाई सहायक महासचिव नियुक्त गर्ने सहमति भएको बताइएको छ । पछिल्लो समयमा एन्फा निर्वाचन समितिमा रहेर जिम्मेवारी निर्वाह गरेका दामोदर (बद्री भट्टराई) लाई पनि सहायक महासचिव बनाउनु पर्ने दबाब नेतृत्वमाथि बढाएको एन्फाका एक सदस्यले बताएका छन् । एन्फा कार्यसमितिले ३ जना महासचिव नियुक्त गर्न सक्ने प्रावधान छ ।