एजेन्सी – ब्राजिली फरवार्ड राफिन्हा क्याटलान क्लब बार्सिलोनामा अनुबन्ध नजिक पुगेको छ । बार्सिलोनाले इंग्लिस क्लब लिड्स युनाइटेडका राफिन्हालाई ६३ मिलियन पाउन्ड खर्चने खर्चने तयारी गरेको छ ।

जसमा ५५ मिलियन पाउन्ड पारिश्रमिक र ८ मिलियन पाउन्ड एड अन रहेका छन् । यसमा तीनै पक्ष सकरात्मक रहेको छ । राफिन्हाको चाहना पनि बार्सिलोना जाने रहेको छ ।

क्लबको आर्थिक स्थितिका कारण बार्सिलोनाले राफिन्हा अनुबन्ध गर्न नसक्ने रिपोर्टहरु सार्वजनिक भएपनि टेलिभिजन राइट्सले बार्सिलोनाले आफ्नो आर्थिक पक्ष सुधार गरेको बुझिएको छ । क्लबबाट सरुवा हुने चर्चा चलेसँगै लिड्सले राफिन्हालाई आफ्नो टोलीमा समेटेको छैन ।

पछिल्लो समय इंग्लिस क्लब चेल्सी पनि राफिन्हा अनुबन्धको दौडमा उभिदा बार्सिलोना नै अघि रहेको बुझिएको छ । यो खबर चेल्सीका प्रशिक्षक थोमस टुचेललाई झट्का नै रहने छ । राफिन्हा अनुबन्ध गर्न नसके चेल्सीले म्यानचेस्टर सिटीका इंग्लिस विंगर रहिम स्टर्लिङको अनुबन्धलाई अन्तिम रुपमा दिने प्रक्रियालाई अघि बढाउनेछ ।

रहिम मेडिकलका लागि लन्डन पुगिसकेका छन् । उनी चेल्सीको अमेरिका भ्रमणमा सामेल हुने बुझिएको छ । म्यानचेस्टर सिटीको डिफेन्डर नाथन एके पनि स्टामफोर्ड ब्रिज फर्कने तयारीमा छन् ।

लिड्समा दुई सिजन बिताएका २५ वर्षीय राफिन्हाले ६७ खेलमा १७ गोल गरेका छन् । २०२१ देखि ब्राजिलको सिनियर टोलीमा रहेका राफिन्हाले ९ क्याप जित्दा ३ अन्तर्राष्ट्रिय गोल गरेका छन् ।