लन्डन (एजेन्सी)– प्रिमियर लिगमा यो सिजन टोटेनह्यामले घरेलु मैदानमा अपराजित यात्रालाई निरन्तरता दिने क्रममा बिहीबार हल सिटीमाथि ३–० को जित निकालेको छ । क्रिस्टियन इरिक्सेनले दुई गोल गरेको खेलमा अर्को गोल भिक्टोर वान्यामाले गरेका थिए ।

डानी रोसीको पासमा १४ औं मिनेटमा गोल गरेका इरिक्सेनले अर्को गोल नजिकबाट ६३ औं मिनेटमा थपे । वान्यामाले ७३ औं मिनेटमा गोल गरेपछि टोलीले सहज जित निकाल्यो । जितसँगै मारिसियो पोचिन्टिनोको टोलीले प्रिमियर लिगमा शीर्ष चारको दौडलाई जारी राखेको छ ।

पाँचौं स्थानमा रहेको टोटेनह्यामको ३० अंक छ भने चौथो स्थानको म्यानचेस्टर सिटीको ३३ अंक छ । समान ३४ अंक जोडेको लिभरपुल दोस्रो र आर्सनल तेस्रो स्थानमा छ । शीर्षस्थानको चेल्सीको ४० अंक छ । लगातार छ वटा अवे खेलमा हार बेहोरेको हल रेलिगेसन क्षेत्रमा छ ।

बिहीबारका अन्य खेलमा चेल्सीले सन्डरल्यान्डलाई १–० ले ,लिभरपुलले मिडल्सब्रोलाई ३–० ले, म्यानचेस्टर सिटीले वाटफोर्डलाई २–० ले, म्यानचेस्टर युनाइटेडले क्रिस्टल प्यालेसलाई २–१ ले हराएको थियो । त्यस्तै वेस्ट ह्याम युनाइटेडले बर्नलीलाई १–० र वेस्ट ब्रुमविचले स्वान्सी सिटीलाई ३–१ ले हराउँदा स्टोक र साउथ ह्याम्टनले गोलरहित बराबरी बराबरी खेलेका छन् ।