एजेन्सी – पोर्चुगल महिला युरो च्याम्पियनसिपमा हारबाट जोगिएको छ । २–० ले पछि परेको स्थितिमा पोर्चुगलले स्वीट्जरल्यान्डसँग रोमाञ्चक २–२ गोलको बराबरी खेलेको हो ।

म्यानचेस्टरमा शनिबार राति भएको खेलमा स्वीट्जरल्यान्डकी कोउम्वा सो र राहिल किविकले गोल गरिन् । पोर्चुगलकी डिएना गोमेस र जेसिका सिल्भाले बराबरी गोल फर्काइन् ।

पोर्चुगल खेलको सुरुवाती पाँच मिनेटमै २–० ले पछि परेको थियो । दोस्रो मिनेटमा कोउम्वा सोले गोल गर्दै स्वीट्जरल्यान्डलाई सुरुवाती अग्रता दिलाईन् । पाँचौ मिनेटमा राहिल किविकले गोल गर्दै स्वीट्जरल्यान्डको अग्रता दोब्बर पारिन् । तर त्यो अग्रतालाई स्वीट्जरल्यान्डले दोस्रो हाफमा जोगाउन सकिनन् ।

५८औं मिनेटमा डिएना गोमेसले गोल गर्दै पोर्चुगललाई खेलमा फर्कने संकेत दिइन् । ६५औं मिनेटमा जेसिका सिल्भाले बराबरी गोल फर्काइन् । त्यसपछि थप गोल निस्कन नसक्दा खेल बराबरीमा टुंगिएको छ ।

यही समुहको अर्काे खेलमा नेदरल्यान्ड्स र स्वीडेनले पनि १–१ गोलको बराबरी खेल्दै अंक बाँडेको छ । स्वीडेनकी जोन्ना एन्डरसनले गोल गर्दा नेदरल्यान्ड्सकी जिल रुडले बराबरी गोल फर्काइन् ।

यो बराबरीपछि यो समूह ‘सी’ मा सबै चार टोलीले समान १ अंक जोडेका छन् । पोर्चुगल, स्वीट्जरल्यान्ड, नेदरल्यान्ड्स र स्वीडेन गोलअन्तरमा क्रमशः पहिलो देखि चौथो स्थानमा रहेका छन् ।