लन्डन (एन्जेसी)– याल्टान इब्राहिमोभिचले खेलको अन्त्यतिर निर्णायक गोल गरेपछि म्यानचेस्टर युनाइटेडले बिहीबार प्रिमियर लिगमा क्रिस्टल प्यालेसलाई २–१ ले हराएको छ । लिगमा अगस्ट यता युनाइटेडको यो लगातार दोस्रो जित हो ।

युनाइटेडको जितमा इब्राहिमोभिचसँगै पाउल पोग्बाको भूमिका महत्वपूर्ण रह्यो । पोग्बाले पहिलो हाफको अन्तिम मिनेटमा उनले युनाइटेडलाई अग्रता दिलाएका थिए । फ्रिकिकमा प्राप्त बललाई पेनाल्टी बक्स भित्र इब्राहिमाोभिचले अघि बढाएपछि पोग्बाले नजिकबाट गोल गरेका थिए ।

दोस्रो हाफमा गोलकिपर डेभिड डी जियाले जेम्स म्याकअर्थरको प्रहार रोक्दै अग्रतालाई जोगाए । तर, ६६ औं मिनेटमा म्याकअर्थरले सफलता प्राप्त गरेर बराबरी गोल फिर्काए । बराबरीतर्फ उन्मुख खेलको दुई मिनेट बाँकी रहँदा पोग्बाको चलाखीपूर्ण पासमा इब्राहिमोभिचले कठिन मोडबाट गोल गर्दै युनाइटेडलाई जित दिलाएका थिए ।

जितपछि पनि जोजे माउरिन्होको टोली २७ अंकका साथ छैटौं स्थानमा । पाँचौं स्थानको टोटेनह्यामको भन्दा ३ अंकले कम हो । लिगका अन्य खेलमा शीर्षस्थानको चेल्सी, लिभरपुल, म्यानचेस्टर सिटी, टोटेनह्याम जस्ता शीर्ष टोली पनि विजयी भएका छन् । त्यस्तै वेस्ट ह्याम युनाइटेड र वेस्ट ब्रुमविचले पनि जित निकालेका छन् भने स्टोक र साउथ ह्याम्टनले बराबरी खेलेका छन् ।