काठमाडौं (हाम्रो खेलकुद) – युवा तथा खेलकुद मन्त्री महेश्वर गहतराज (अथक) ले महिला राष्ट्रिय फुटबल टोलीकी कप्तान रेनुका नगरकोटेको स्वास्थ्यस्थितिबारे जानकारी लिएका छन् ।

अनिश्चित रहेको १९औं एसियाली खेलकुद (एसियाड) तयारीको प्रशिक्षणका क्रममा घाईते भएकी नगरकोटेलाई भेट्न बिहिबार बिहान बी एण्ड बी अस्पताल पुग्दै मन्त्री गहतराजले पछिल्लो स्वास्थ्य अवस्थाको बारेमा जानकारी लिएका हुन् ।

प्रशिक्षणका क्रममा दुःखद घटना भएको भन्दै मन्त्री गहतले नगरकोटेलाई छिट्टै मैदानमा फर्केको हेर्न चाहेको बताउँदै घाईतेको उपचारमा कुनै कमी हुन नदिने प्रतिवद्धता समेत जनाएका छन् ।

राष्ट्रिय खेलकुद परिषद (राखेप) ले आयोजना गरेको प्रशिक्षणका क्रममा सोमबार सरस्वती ऐरको ट्याकलमा पर्दा सन्तुलन गुमाउँदै मैदानमा लडेकी रेनुकाको शरीरको बायाँ भागको क्लाभिकल (कलरबोन अर्थात घाँटीमुनिको हड्डी) फ्याक्चर भएको थियो ।

सोमबार नै उनको ललितपुरको ग्वार्कोस्थित बि एन्ड बी अस्पतालमा डा. अमित जोशीको टोलीले सोमबार उनको सफल शल्यक्रिया गरेको हो । उनी अहिले अस्पतालमै रहेको र केही दिनमै डिस्चार्ज गरिने अस्पतालले जनाएको छ ।

शल्यक्रिया सफल भएको र कुनै समस्या नआएमा रेनुकालाई मैदान फर्कन करिव ३ महिना लाग्ने अस्पतालले जनाएको छ । १२ साता मैदान बाहिर रहने भएपछि रेनुकाले घरेलु मैदानमा भदौंमा आयोजना हुने भनिएको महिला साफ च्याम्पियनसिप गुमाउने भएकी छिन् । साफ भदौ १३ गतेदेखि २५ गतेसम्म हुने तय भएको छ । मैदान भने तय भइसकेको छैन ।

सन् २०१० देखि महिला राष्ट्रिय टोलीकी नियमित सदस्य रहँदै आएकी रेनुका नियमित कप्तान निरु थापाले सन्न्यासको घोषणा गरेपछि उनी टोलीको कप्तान बनेकी थिइन् ।