पोखरा (हाम्रो खेलकुद) – छैटौं नेपाल आइस अन्तर्राष्ट्रिय आमन्त्रण शुभकामना हेम्जा गोल्डकपको उपाधिका लागि आज (आइतबार) क्यामरुनी क्लब एभिनियर एफसी डोउला र आयोजक हेम्जा युनाइटेडबीच प्रतिस्पर्धा हुँदैछ ।

फाइनल पोखरास्थित गौरीशंकर खेलमैदानमा हुनेछ । शनिबारै फाइनल खेल हुनुपर्ने भएपनि क्लबको स्थापनाकालदेखिकै सहयोगी अरविन कुँवरको दुर्घटनामा परि निधन भएपछि फाइनल एक दिन पछि सारिएको थियो ।

हेम्जाले सेमिफाइनलमा खुमलटार युथ क्लबलाई २–० ले तथा एभिनियरले चर्च ब्वाइज क्लबलाई २–१ ले पराजित गर्दै फाइनल भिडन्त पक्का गरेको हो ।

फाइनल खेल अघि शुक्रबार गरिएको पत्रकार सम्मेलनमा आयोजक हेम्जा युनाइटेडका प्रशिक्षक सुवर्ण जंग कार्कीले एभिनियर शारिरीक रुपमा बलियो रहेपनि टोली फाइनलको लागि तयार रहेको बताएका छन् । एभिनियरका प्रशिक्षक आसिक थापा मगरले फाइनल खेल बराबरीको हुने प्रतिक्रिया दिएका छन् ।

असार असार ४ गतेदेखी सुरु भएको प्रतियोगितामा कुल ८ टिमको सहभागिता रहेको थियो । प्रतियोगितामा विभागिय क्लब एपिएफ, चर्च ब्वाइज, क्यामरुनी क्लब एभिनियर एफसी डोउला, खुमलटार, कालिका स्पोट्र्स चितवन, बागमती युवा क्लब सर्लाही, विरगंज युनाइटेड र आयोजक हेम्जा युनाइटेड को सहभागिता रहेको थियो ।

प्रतियोगिताको विजेताले ६ लाख रुपैयाँसँगै शिल्ड, मेडल र प्रमाणपत्र प्राप्त गर्नेछन् । उपविजेताले नगद ३ लाख रुपैयाँसँगै शिल्ड, मेडल र प्रमाणपत्र प्राप्त गर्नेछन् । सर्वोत्कृष्ट खेलाडीले ५० हजार रुपैयाँको साथमा ट्रफी प्राप्त गर्नेछन् ।

सर्वाधिक गोलकर्ताले २५ हजार रुपैयाँ तथा उत्कृष्ट डिफेनडर, फिडफिल्डर, फरवार्ड, गोलरक्षक तथा उदीयमान खेलाडीले २०–२० हजार रुपैयाँ प्राप्त गर्नेछन् । अनुशासित टिमले २५ हजार रुपैयाँ प्राप्त गर्नेछन् ।