पोखरा (हाम्रो खेलकुद) – पोखराको हेम्जामा जारी छैटौं नेपाल आइस अन्तर्राष्ट्रिय आमन्त्रण शुभकामना हेम्जा गोल्डकपको फाइनल खेल स्थगित भएको छ ।

आयोजक हेमजा युनाइटेड शनिबारको लागि तय भएको फाइनल खेल स्थगित भएको र फाइनल १२ असारमा हुने जानकारी गराएको छ । आयोजक हेम्जा युनाइटेडसँगै क्यामरुनी क्लब एभिनियर एफसी डोउला फाइनलमा पुगेका छन् ।

क्लबले एक विज्ञप्ति जारी गर्दै हेम्जा युनाईटेडको स्थापनाकालदेखि सहयोग गर्दै आएका अरविन कुँवरको दुर्घटनामा परि निधन भएको कारण फाईनल खेल स्थगित भएको हेमजा युनाईटेडका अध्यक्ष इन्द्रबहादुर कुँवरले जारी गरेको विज्ञप्तिमा उल्लेख छ ।

‘यस दुखद घडीमा शोक सन्तप्त परिवारजनमा धैर्य धारण गर्ने शक्ति होस् भन्दै दिवङ्गत आत्माको चिर शान्तिको कामना गर्दछौं ।’ क्लबद्धारा जारी विज्ञप्तीमा जनाईएको छ ।

असार असार ४ गतेदेखी सुरु भएको प्रतियोगितामा कुल ८ टिमको सहभागिता रहेको थियो । प्रतियोगितामा विभागिय क्लब एपिएफ, चर्च ब्वाइज, विदेशी अफ्रिकनी टिम क्यामरुन, खुमलटार, कालिका स्पोट्र्स चितवन, बागमती युवा क्लब सर्लाही, विरगंज युनाइटेड र आयोजक हेम्जा युनाइटेड को सहभागिता रहेको थियो ।

प्रतियोगिताको विजेताले ६ लाख रुपैयाँसँगै शिल्ड, मेडल र प्रमाणपत्र प्राप्त गर्नेछन् । उपविजेताले नगद ३ लाख रुपैयाँसँगै शिल्ड, मेडल र प्रमाणपत्र प्राप्त गर्नेछन् । सर्वोत्कृष्ट खेलाडीले ५० हजार रुपैयाँको साथमा ट्रफि प्राप्त गर्नेछन् । सर्वाधिक गोलकर्ताले २५ हजार रुपैयाँ तथा उत्कृष्ट डिफेन्डर, फिडफिल्डर, फरवार्ड, गोलरक्षक तथा उदीयमान खेलाडीले २०–२० हजार रुपैयाँ प्राप्त गर्नेछन् । अनुशासित टिमले २५ हजार रुपैयाँ प्राप्त गर्नेछन् ।