काठमाडौं (हाम्रो खेलकुद) – अखिल नेपाल फुटबल संघ (एन्फा) को महासचिवमा किरण राई तथा कोषाध्यक्षमा रविन्द्र जोशी नियुक्त भएका छन् ।

नवनिर्वाचित एन्फा केन्द्रिय कमिटिको बुधबार बसेको पहिलो बैठकले राईलाई महासचिवमा तथा जोशीलाई कोषाध्यक्षमा नियुक्त गरेको हो । एन्फाको विधानमा महासचिव र कोषाध्यक्ष नियुक्त गर्ने प्रावधान छ ।

किरण राई यसअघिको कार्यसमितिमा एन्फा सदस्यसँगै प्रवक्ता रहेका थिए । गत वर्ष उनले प्रवक्ताको जिम्मेवारी छोडेका थिए । जोशी यसअघिको कार्यसमितिमा कोषाध्यक्ष नै रहेका थिए । यस्तै अन्तर्राष्ट्रिय प्रमुखमा नविन पाण्डेलाई नियुक्त गरेको छ ।

नव निर्वाचित कार्यसमितिले बुधबारै पद तथा गोपनियताको सपथ लिएका छन् । १९ सदस्यीय निर्वाचित कार्यसमितिलाई एन्फाको निर्वाचन समितिले पद तथा गोपनियताको सपथ खुवाएका थिए ।

अब दुई सदस्यको टुंगो अर्काे अर्काे निर्वाचनबाट लाग्नेछ । १३ मध्ये ११ सदस्य निर्वाचित हुँदा चार उमेदवारको समान ३९ मत आएपछि एन्फाले अर्काे निर्वाचन गराउने निर्णय गरेको छ ।

एन्फाको नवनिर्वाचित कमिटी
अध्यक्ष – पंकज विक्रम नेम्वाङ
वरिष्ठ उपाध्यक्ष – विर बहादुर खड्का
उपाध्यक्ष – दावा लामा, विराट जंग शाही, दीपक खतिवडा र दीर्घ बहादुर केसी (कुमार)
महासचिव – किरण राई
कोषाध्यक्ष – रविन्द्र जोशी
महिला सदस्य – सरिला श्रेष्ठ र पेमा डोल्मा लामा
सदस्य – मनिष जोशी, अनिल मल्ल, रविन्द्र चन्द, विकास नारायण श्रेष्ठ, भोजराज शाही, महेन्द्र क्षेत्री, पुरुषोत्तम थापा, रमेश व्यन्जनकार, मनिराज विष्ट, टिकाराम लामा र भरत बुढ् थापा । (दुई सदस्य निर्वाचित हुन बाँकी)