काठमाडौं (हाम्रो खेलकुद) – अखिल नेपाल फुटबल संघ (एन्फा) का नवनिर्वाचित पदाधिकारीले बुधबार पद तथा गोपनियताको सपथ लिएका छन् ।

ललितपुरको सातदोबाटोस्थित एन्फा कम्प्लेक्समा बुधबार संघका नवनिर्वाचित कमिटिले पद तथा गोपनियताको सपथ लिएका हुन् । एन्फाको निर्वाचन समितिले अध्यक्ष पंकज विक्रम नेम्वाङसहित निर्वाचित १९ पदाधिकारीलाई सपथ खुवाएको हो ।

गत सोमबार भएको निर्वाचनमा पंकजबिक्रम नेम्वाङको नेतृत्वमा १९ सदस्यीय नयाँ कार्यसमिति निर्वाचित भएको थियो । वरिष्ठ उपाध्यक्षमा वीरबहादुर खड्का, उपाध्यक्षहरुमा दावा लामा, दिपक खतिवडा, बिराटजंग शाही र दुर्गाबहादुर केसी (कुमार) निर्वाचित भएका थिए ।

सदस्यमा मनिष जोशी, अनिल मल्ल, रबिन्द्र चन्द, विकास नारायण श्रेष्ठ, भोजराज शाही, महेन्द्र क्षेत्री, पुरुषोत्तम थापा, रमेश ब्यन्जनकार, मनिराज विष्ट, टिका लामा, भरतबुढ थापा, सरिला श्रेष्ठ र पेमा डोल्मा लामा निर्वाचित भएका थिए ।

सपथ ग्रहण लगत्तै नवनियुक्त अध्यक्ष नेम्वाङले आफ्नो पदभार ग्रहण गरेका थिए । नेम्वाङले नि वर्तमान अध्यक्ष कर्माछिरिङ शेर्पालाई ६ मतले पराजित गर्दै अध्यक्षमा निर्वाचित भएका थिए । ८४ मतमध्ये नेम्वाङले ४५ तथा शेर्पाले ३९ मत पाएका थिए ।

२१ सदस्यीय कार्यसमिति निर्वाचित गर्नुपर्ने भएपनि कार्यसमितिले पूर्णता भने पाइसकेको छैन । १३ सदस्यमध्ये ११ सदस्य निर्वाचित हुँदा चार उमेदवारको समान ३९ मत आएपछि पुनः निर्वाचन हुने एन्फाले जनाएको छ ।

एन्फाले यि चारबीच नै हुने निर्वाचनको मिति तोक्नेछ । दीपक थापा क्षेत्री, दिपेन्द्र धिमाल, रुपेश अधिकारी र लोकेन्द्र गुरुङले समान ३९ मत पाएका छन् । यही कार्यसमितिले नै महासचिव र कोषाध्यक्ष मनोनयन गर्नेछ ।