पोखरा (हाम्रा खेलकुद) – विभागीय नेपाल एपिएफ क्लबमाथि सानदार जित निकाल्दै क्यामरुनी क्लब एभेनियर एफसी डोउला छैटौं शुभकामना गोल्डकप फुटबल प्रतियोगिताको सेमिफाइनलमा प्रवेश गरेको छ ।

एपिएफलाई ४–१ को फराकिलो अन्तरले पराजित गर्दै एभेनियरले अन्तिम चारमा चर्च ब्वाइज युनाइटेडसँगको भेट पक्का गरेको हो । एभेनियरको जितमा विल्लेले दुई तथा सामेसामे र फ्रेडेरिकले समान एक गोल गरे । एपिएफका सविन थापाले एक गोल फर्काए ।

हेमजा युनाइटेडको आयोजनामा गौरीशंकर माविको खेल मैदानमा मंगलबार अन्तिम क्वाटरफाइनलको २७औं मिनेटमा परिवर्तित खेलाडी सामेसामेले गोल गर्दै एभिनियरलाई अग्रता दिलाए ।

पहिलो हाफको इन्ज्युरी समयमा फ्रेडेरिकले उत्कृष्ट गोल गर्दै टोलीको अग्रता दोब्बर पारे । सुरुवातदेखि नै हावी भएको एभेनियरले उत्कृष्ट खेल पस्कदा एपिएफ निरिह बन्न पुगेको थियो ।

८६औं मिनेटमा परिवर्तित खेलाडी विल्लेले गोल गर्दै एभेजियरको अग्रता तेब्बर पारे । विल्लेले नै इन्ज्युरी समयको थप गरिएको तेस्रो मिनेटमा व्यक्तिगत दोस्रो तथा टोलीका लागि चौथो गोल गर्दै टोलीलाई सहज जित दिलाए ।

दोस्रो हाफमा १० खेलाडीमा सीमित एपिएफका लागि सविन थापाले इन्ज्युरी समयको थप गरिएको चौथो मिनेटमा गोल गरेपनि हार टार्न सकेन । बुधबार पहिलो सेमिफाइनलमा आयोजक हेमजा युनाइटेड र खुमलटारबीच प्रतिस्पर्धा हुनेछ ।