एजेन्सी – भिक्टर ओसिमहेनले ह्याट्रिकसहित चार गोल गरेपछि नाइजेरियाले कीर्तिमानी जित निकालेको छ । नाइजेरियाले अफ्रिका कप अफ नेसन्समा साओ टोम एन्ड प्रिन्सिपेमाथि १०–० को सानदार जित निकालेको छ ।

नाइजेरियाको इतिहासमा यो सबैभन्दा ठुलो र फराकिलो जित हो । यसअघि नाइजेरियाले सन् १९५९ मा दाहोमेमाथि १०–१ को फराकिलो जित निकालेको थियो ।

मोरोक्कोमा सोमबार राति भएको खेलमा नाइजेरियाको फराकिलो जितमा ओसिमहेनले चार गोल गर्दा तेरेम मोफीले दुई तथा मोसेस सिमोन, ओगहेनेकारो इटिवो, एडेमोला लुकमान र इमानुयल डेनिसले समान एक गोल गरे । पहिलो हाफमा ३–० को अग्रता बनाएको नाइजेरियाले दोस्रो हाफमा ७ गोल थप्दै फराकिलो जित निकाल्न सफल भयो ।

२३ वर्षीय ओसिमहेनले २२ अन्तर्राष्ट्रिय क्यापमा १५ गोल गरिसकेका छन् । उनी एकै खेलमा चार गोल गर्ने खेलाडी बनेका छन् । यसअघि रासिदी येकिनीले सन् १९९१ म बुर्किना फासोविरुद्ध नेसन्स कपकै छनोटमा चार गोल गर्ने पहिलो खेलाडी बनेका थिए ।

यो जितसँगै छनोटको समूह ‘ए’ मा रहेको नाइजेरियाले लगातार दोस्रो जित निकाल्दै शीर्षस्थानमा रहेको छ । गिनिया विसाउ ४ अंक जोडेर दोस्रो स्थानमा रहेको छ । सिएरा लिओन १ अंक जोडेर तेस्रो स्थानमा रहँदा साओ टोम एन्ड प्रिन्सिपे अंकविहीन हुँदै पुछारमा छ ।