एजेन्सी – चेक रिपब्लिकमाथि सहज जित निकाल्दै स्पेन युइएफए नेसन्स लिग ए ग्रुप २ मा शीर्षस्थानमा उक्लिएको छ । स्पेनले घरेलु मैदानमा चेक रिपब्लिकमाथि २–० को सहज जित निकालेको हो ।

अर्काे खेलमा पोर्चुगलले हार बेहोरेपछि स्पेन शीर्षस्थानमा उक्लन सफल भयो । स्पेनको मालगामा आइतबार राति भएको खेलमा घरेलु टोलीको जितमा कार्लाेस सोलेर र पाब्लो सारावियाले गोल गरे । स्पेनले पहिलो र दोस्रो हाफमा समान एक गोल गरेको थियो ।

खेलको २४औं मिनेटमा कार्लाेस सोलेरले गोल गर्दै स्पेनलाई सुरुवाती अग्रता दिलाए । उनले मार्काे एसेन्सियोको पासमा गोल गर्न सफल भयो । त्यसपछि ७५औं मिनेटमा परिवर्तित खेलाडी पाब्लो सारावियाले गोल गर्दै स्पेनको जित पक्का गरे ।

७२औं मिनेटमा मार्काे एसेन्सियोको स्थानमा मैदान छिरेका पाब्लोले मैदान छिरेको तेस्रो मिनेटमै अर्का परिवर्तित खेलाडी फेरान टोरेसको पासमा गोल गर्न सफल भएका थिए ।

यो जितसँगै अपराजित रहेको स्पेन ४ खेलबाट ८ अंक जोडेर शीर्षस्थानमा उक्लिएको छ । स्पेनले समान २ जित र हारको नतिजा निकालेको छ । पराजित चेक रिपब्लिक ४ अंक जोडेर तेस्रो स्थानमा रहेको छ । पोर्चुगल ७ अंक जोडेर दोस्रो स्थानमा झर्दा स्वीट्जरल्यान्ड ३ अंक जोडेर पुछारमा छ ।

यही समूहको अर्काे खेलमा पोर्चुगल घरेलु टोली स्वीट्जरल्यान्डसँग १–० ले पराजित भएको छ । स्वीट्जरल्यान्डमा आइतबार राति भएको खेलमा घरेलु टोलीको जितमा हरिस सेफेरोभिकले गरेको गोल नै निर्णायक बन्यो । उनले खेलको पहिलो मिनेटमा नै सिल्भान विडमेरको पासमा गोल गर्न सफल भएका थिए ।