एजेन्सी – फ्रान्सेली युवा स्टार मिडफिल्डर ओरेलिएन चुवामेनी स्पेनिस महारथी रियल म्याड्रिडमा अनुबन्ध नजिक पुगेको छ । रिपोर्टअनुसार लस ब्लान्कोस र मोनाको बीच सहमति भइसकेको छ ।

रियल म्याड्रिडले अर्को सिजनको लागि चुवामेनीलाई सम्झौता गरिसकेको र छिट्टै आधिकारिक घोषणा गरिने अपेक्षा गरिएको छ । उनको अनुबन्ध रकम र सम्झौता अवधिबारे केही खुलाइएको छैन । तर, उनको अनुबन्ध रकम ८५ मिलियन पाउन्डभन्दा बढी रहेको बुझिएको छ ।

जर्मन डिफेन्डर एन्टोनियो रुडिगर पछि नयाँ सिजनको लागि रियलको यो दोस्रो अनुबन्ध हो । रुडिगर फ्रि एजेन्टमा इंग्लिस क्लब चेल्सीबाट रियलमा अनुबन्धित भएका हुन् ।

२२ वर्षीय ओरलिएन चुवामेनीलाई अनुबन्ध गर्न फ्रान्सेली क्लब पिएसजीसँगै इंग्लिस क्लब लिभरपुलले पनि चासो देखाएको थियो । तर, पिएसजीको अन्तिम प्रयासलाई माथ दिदै उनले युरोपियन च्याम्पियन क्लब रोजेका हुन् ।

चुवामेनीको आगमनले रियलमा अब इडुआर्डाे कामाभिंगा, फेडे भाल्भेर्डे र चुवामेनीको ट्रिओ मिडफिल्ड बन्नेछ । यो ट्रिओले क्यासमिरो, लुका मोड्रिच र टोनी क्रुसको ऐतिहासिक र अत्यन्त सफल ट्रिओलाई विस्थापित गर्र्ने विश्वास गरिएको छ ।

क्यासमिरो, लुका र टोनीको ट्रिओ मिडफिल्डलाई विश्वकै उत्कृष्ट ट्रिओ मिडफिल्डरको रुपमा हेरिने गर्दछ । रियलमा यि तीनै खेलाडीको सम्झौता सकिने संघारमा छ । सोही कारण पनि रियलले उनीहरुको विकल्पमा नया मिडफिल्डर तयार पार्न लागि परेको छ ।

चुवामेनीले गत सिजन मोनाकोका लागि ५० खेल खेलेका थिए । मोनाको फ्रेन्च लिग वानमा तेस्रो हुँदा उनको प्रदर्शनले सबैको ध्यान खिच्न सफल भएको थियो । गत सेप्टेम्वरमा फ्रान्सको सिनिउयर टोलीमा डेब्यु गरेका चुवामेनीले फ्रान्सका लासग ९ क्याप जितिसकेका छन् ।