काठमाडौं (हाम्रो खेलकुद) – नेपाली राष्ट्रिय फुटबल टोलीको पूर्व प्रशिक्षक दक्षिण कोरियाली यो की ह्योङ यति बेला नेपालमा छन् । तर, यसपटक उनी कुनै औपचारिक जिम्मेवारी पुरा गर्नका लागि भने नेपाल आएका होइनन् । दुई पटक नेपाली टोलीलाई प्रशिक्षण दिएका ह्योङ अखिल नेपाल फुटबल संघ (एन्फा) का मनार्थ अध्यक्ष टासी घले र उनी पहिलो पटक नेपाल आउँदाका दोभाषे विजय शाहीको पहलमा यसपटक व्यक्तिगत भ्रमणका लागि नेपाल आएका हुन् । मंगलबार उनी केही दिनका लागि शाहीसँग पोखरा जाँदैछन् ।

सन् १९९८ मा बैंकक एसियाड र अर्को पटक २००३ मा नेपालले बंगलादेशमा साफ च्याम्पियनसिप खेलेको थियो । यद्दपी ती दुवै प्रतियोगितामा नेपालको प्रदर्शन सम्झन लायक रहेन । तर, पनि उनको नेपाली खेलाडीसँगको सम्झना भने ताजै देखियो । हरि खड्का, बालगोपाल महर्जन, उपेन्द्रमान सिंह, राकेश श्रेष्ठको नाम अहिले पनि उनलाई कन्ठै छ ।

तीनै ह्योङले आफुले प्रशिक्षण दिएका खेलाडीका लागि सोमबार साँझ राजधानीमा रात्री भोजका आयोजना गरे । जहाँ हरि,बालगोपाल,राकेशलगायत फुटबलसँग सम्बन्धित अन्यको पनि उपस्थिति थियो । शाहीमार्फत आफ्ना नेपाली फुटबलसँगको पुराना सम्झना साटेका थिए । उनले सधै नेपाली फुटबल प्रगती हेर्न चाहेको पनि सुनाए । कोरिया पूर्व राष्ट्रिय खेलाडी एवंम् पूर्व साहायक प्रशिक्षक समेत रहेका ७० बर्षिय ह्योङले अझै पनि नेपाली फुटबलमा काम गर्न चाहेको सुनाउँछन् ।

ह्योङले यसपटक पोखरामा माघ ४ बाट सुरु हुने आहा रारा गोल्डकपमा कोरियाली विश्वविद्यालयको कुनै एउटा टोली ल्याउने पहल पनि गरिरहेका छन् ।