काठमाडौं (हाम्रो खेलकुद) – थ्री स्टार क्लबका युवा मिडफिल्डर मनग्य नकर्मी भारतको कोलकत्ता फुटबल लिग क्लब खिदिरपुर स्पोर्टिङ क्लबमा आबद्ध भएका छन् ।

नेपालको शीर्ष डिभिजन सहिद स्मारक ए डिभिजन लिगको अनुभव बटुलिसकेका नकर्मीले खिदिरपुरसँग सिजनको अन्त्य सम्मका लाागि सम्झौता गरेका हुन् । नेपालको लिग सकिए लगतै भारत पुगेका उनी र खिदिरपुर स्पोर्टिङ क्लबबीच यो सिजनको लागि सम्झौता भएको क्लबले आज जनाएको छ ।

एन्फा एकेडेमीका उत्पादन नकर्मीले यु–१२, यु–१४ र यु–१५ उमेर समूहमा प्रतिनिधि गरिसकेका छन् । एकेडेमीबाट निस्किए लगत्तै मनग्य सन् २०१८ मा थ्री स्टार क्लबमा आबद्ध भएका थिए । उनले सन् २०१९ मा सरस्वती युथ क्लबविरुद्ध खेल्दै शीर्ष डिभिजन लिगमा डेब्यु गरेका थिए । थ्री स्टारमा पर्याप्त समय खेल्ने अवसर नपाएका मनग्यले मौका पाउँदा उत्कृष्ट खेल पस्किने गरेका छन् ।

विदेशको लिग खेलेर नयाँ अनुभव र आफ्नो कौशलता वृद्धि हुनेमा उनी विश्वस्त छन् । ‘सर्वप्रथम मलाई विश्वास गरेर मौका दिनुभएकोमा खिदिरपुर स्पोर्टिङ क्लबलाई धन्यवाद व्यक्त गर्न चाहन्छु । विदेशी लिग खेलेर धेरै कुरा सिक्छु भन्नेमा आशावादी छु । गत हप्ता देखि टोली सँग प्रशिक्षण पनि सुरु गरिसकेको छु र यहाँ निकै व्यवसायिक वातावरण पाएको छु । क्लबले गरेको विश्वासलाई सम्मान गर्दै आफ्नो सत प्रतिशत दिएर खेल्नेछु ।’ उनले भने ।

कोलकत्ता फुटबल लिग आगामी जुलाईबाट सुरु हुने भनिएपनि अधिकारिक तालिका प्रकाशित भइसकेको छैन । कोलकत्ता फुटबल लिगको अनुभव बटुलिसकेका ओमोलाजा नुरेन करिम र अन्सुमाना क्रोमाले गत सिजन नेपालको सहिद स्मारक ए डभिजन लिग खेलेका थिए ।

मनग्य अहिले यु–२० छनोटको लागि काठमाडौंमा आइसकेका छन् । साफ यु–२० च्याम्पियनसिप र एएफसी यु–२० एसियन कप छनोटका लागि २० जेठदेखि खेलाडी छनोट हुँदैछ । यु–२० टोलीको मुख्य प्रशिक्षकमा मेघराज केसी रहेका छन् ।

साफ यु–२० साफ च्याम्पियनसिप भारतमा जुलाई २५ देखि ३ अगस्टसम्म हुँदैछ । एएफसी यु–२० एसियन कप छनोट बहराइनमा १० देखि १८ सेप्टेम्वरसम्म आयोजना हुँदैछ ।