एजेन्सी – अमेरिकी ब्यापारी टोड बोहलीलाई इंग्लिस क्लब चेल्सी खरिद गर्र्ने बाटो थप सहज भएको छ । चेल्सीका हालका मालिक रोमन अब्रामोविचको पासपोर्ट पोर्चुगलको पनि रहेकाले टोडलाई पोर्चुगल सरकारको पनि स्वीकृति लिनुपर्नेमा अनुमति पाएपछि खरिदको बाटो थप सहज भएको हो ।

प्रिमियर लिग र बेलायत सरकारले पनि चेल्सी क्लब र त्यसको लाइसेन्स बिक्रीका लागि स्वीकृति दिइसकेको छ । अमेरिकी व्यापारी टोडले ४.२५ बिलियन पाउण्डमा चेल्सीलाई खरिद गर्ने तयारी गरेका छन् । पोर्चुगल सरकारको पनि स्वीकृति पाएपछि अब टोडले चेल्सीलाई आधिकारिक रुपमा आफ्नो स्वामित्वमा लिनेछन् ।

रसियाले युक्रेनमाथि आक्रमण गर्दा बेलायत सरकारले रोमनको सम्बन्ध रसियन राष्ट्रपति भ्लादिमिर पुटिनसँग रहेको भन्दै उनलाई बेलायतमा बस्न र कुनैपनि ब्यापार गर्न प्रतिबन्ध लगाएको थियो । सोही कारण हालका मालिक रोमन अब्रामोभिचले बिक्री गर्नुपर्ने बाध्यता आएको थियो । अब्रामोभिचले चेल्सीलाई १९ वर्षअघि खरिद गरेका थिए । चेल्सीमा लगानी गर्दा रोमनले १.५ विलियन पाउण्ड तिर्न बाँकी रहेको ऋण पनि मिनाहा गरिदिने भएका छन् ।

अब टोडले २.५ विलियन पाउण्डमा क्लबको सेयर र बैंकमा तिर्न बाँकी रकममा लगाउनेछन् । १.७५ विलियन पाउण्ड भविष्यको लागि डिपोजिट गर्नेछन् । जसबाट क्लबको एकेडेमी, महिला टिम, चेल्सी फाउन्डेसन लगायतमा खर्च गरिनेछ ।