काठमाडौं (हाम्रो खेलकुद) – अखिल नेपाल फुटबल संघ (एन्फा) को आसन्न निर्वाचनका लागि फ्रेन्ड्स क्लबका पूर्व अध्यक्ष राजिव पौडेलले अध्यक्षमा उम्मेदवारी दिने भएका छन् ।

परिवर्तनको नारा लिएर आएका कुनै समुहले पनि सोचेजस्तो परिवर्तन गर्न नसकेका कारण आफ्नो उम्मेदवारी रहेको उनले बताए । ‘२०-२५ वर्षमा प्रवृत्ति बदलिएन । मुख्य उद्देश्य कागजमा सुधार भनेपनि पछिल्लो कार्यसमितिले त्यसलाई सोच जस्तो अबलम्बन गर्न सकेन । अध्यक्ष र वरिष्ठ उपाध्यक्षबीच असमझदारी बढ्दा संस्थाले काम गर्न सकेन,’ उनले भने ।

एन्फाको समस्या आन्तरिक रुपमा सुल्झाउनु पर्ने भएपनि संघले त्यसो गर्न नसकेको उनले बताए । ‘एन्फामा भएका हरेक विवाद आन्तरिक रुपमा बनेका समितिले सुल्झाउनु पर्ने हो । वरिष्ठ उपाध्यक्ष र प्रशिक्षकको विवाद होस् वा प्रशिक्षक र खेलाडी, यी विवाद आन्तरिक रुपमा सुल्झाउन सकिन्थ्यो । तर वहाँहरू यसलाई बाहिर लगेर राजनितिकरण गर्न लाग्नुभयो । मेरो यसमा असहमति थियो,’ उनले बताए ।

पौडेलले उम्मेदवारीका लागि घोषणा पत्र सार्वजनिक गर्दै पाँच विषयलाई प्राथमिकतामा राखेका छन् । उनले सुशासन, पूर्वाधार, ग्रासरुट तथा युवा र महिला फुटबल, प्रतियोगिता तथा राष्ट्रिय टिम र सम्बन्धित पक्ष (दाँवधारी) लाई प्राथमिकतामा राखेका छन् । उनले नेपाललाई सन् २०२४ सम्ममा दक्षिण एसियामा उत्कृष्ट तथा २०२६ सम्म एसियाकै शीर्ष १० मा पुर्याउने लक्ष्य राखेका छन् ।

एन्फाको चुनाव असार ६ गते हुँदैछ । यसपटक अध्यक्ष पदका लागि हालका अध्यक्ष कर्मा छिरिङ शेर्पा र वरिष्ठ उपाध्यक्ष पंकजविक्रम नेम्वाङले उम्मेदवारी दिइसकेका छन् । दुवै पक्षले ५० बढी प्रतिनिधिलाई घोषणा समारोहमा उपस्थित गराएका थिए । एन्फामा ८७ मताधिकार प्रतिनिधि रहेका छन् ।

पौडेलको उम्मेदवारी घोषणामा भने कोही मताधिकार प्रतिनिधि उपस्थित थिएनन् । उनले उम्मेदवारी दर्ता गर्दासम्म प्रस्तावक र समर्थक बन्न आवश्यक प्रतिनिधिको साथ पाउने आशा राखेका छन् । फ्रेन्ड्सको मताधिकार प्रतिनिधि रहेका अध्यक्ष दीपक थापा कर्मा छिरिङ शेर्पा प्यानलमा केन्द्रीय सदस्य उम्मेदवार रहेका छन् ।

पौडेल यसअघि दुई पटक फ्रेन्ड्स क्लबको अध्यक्ष रहिसकेका छन् । उनी हाल एन्फाको मार्केटिङ समितिको संयोजक तथा एएफसीको मार्केटिङ समितिको सदस्य रहेका छन् । उनी गणेश थापा एन्फा अध्यक्ष रहँदा केन्द्रीय सदस्य तथा मिडिया संयोजक समेत थिए ।