न्यूक्यासलसँग आर्सनल स्तब्ध

एजेन्सी – शीर्ष चारको दौडमा रहेको आर्सनल न्यूक्यासल युनाइटेडसँग स्तब्ध बनेको छ । आर्सनल घरेलु टोलीसँग २–० ले स्तब्ध बनेको हो ।

सेन्ट जेम्स पार्कमा सोमबार राति भएको खेलमा घरेलु टोलीको जितमा ब्रुनो गुइमारेइसले एक गोल गर्दा एक गोल उपहार पाएको थियो । दुवै गोल दोस्रो हाफमा सम्भव भएको थियो ।

प्रतिस्पर्धात्मक बनेको खेलको ५५औं मिनेटमा बेन ह्वाइटको आत्मघाती गोलबाट आर्सनल खेलमा पछि परेको थियो । त्यसपछि ८५औं मिनेटमा ब्रुनो गुइमारेइसले गोल गर्दै आर्सनललाई २–० ले स्तब्ध पारे ।

न्यूक्यासलसँगको हारसँगै आर्सनलको शीर्ष चारमा धक्का लागेको छ । हारसँगै आर्सनल ३७ खेलबाट ६६ अंक जोडेर पाँचौ स्थानमा यथावत रहँदा चौथो स्थानमा उक्लने मौका गुमाएको छ । चौथो स्थानमा रहेको टोटेनहम हटस्परको ६८ अंक छ । न्यूक्यासल ४६ अंक जोडेर १२औं स्थानमा रहेको छ ।

अब आर्सनललाई शीर्ष चारमा रहेर आगमी सिजनको च्याम्पियन्स लिग खेल्नका लागि आफु अनुकुल नतिजा निकाल्नुपर्नेछ । आफ्नो अन्तिम खेलमा जित तथा चौथो स्थानको टोटेनहमले हार बेहोर्नुपर्ने हुन्छ ।